USA ka batan-ong lalake ni-apply nga magpa-boy sa usa ka pamilya nga daghan og mga binuhi nga iro. Gidawat siya ug gipasabot siya sa iyang amo nga ang una niyang obligasyon mao ang pag-atiman sa ilang mga mahalong iro.
Matod pa sa amo, “Kinahanglan nga pakan-on nimo ang mga iro sa saktong oras aron di mapasmo. Ang imong ipakaon, kon di beef steak, corned beef o di ba crispy pata.” Tubag sa boy, “Kining Sir, pwede bag mo-apply na lang ko pagka-iro?”
Maayo kini sa mga iro nga tinangkal ug inatiman. Apan hangtod karon, makakita gihapon kita og daghang mga iro nga binuhian. Dunay mowiki-wiki ang ikog kon makakita nato, duna say mopaghot ug mopakita sa hait kaayong mga ngipon.
Usa ka tawo nga niagi sa hagip-ot nga dalan sa nagsikit-sikit nga kabalayan, nangutana sa tawo nga naglingkod tapad sa naglubog nga iro, “Mamaak na, Noy?” Tubag sa tag-iya, “Unsay tan-aw nimo ani, Manny Pacquiao kay manumbag?”
Laing tawo niingon nga di mamaak ang iyang iro. Apan gipaak ang nangutana busa nasuko ug niingon, “Ingon ka, Noy, di mamaak. Gipaak man lagi ko?” Tubag pa niya, “Ang akong iro di mamaak. Ang nipaak nimo di man na ako.”
Delikado gihapon kitang mapaakan sa iro kon daghan lang gihapon ang mga irov nga binuhian, butang nga gustong sumpuon sa Republic Act No. 9482, ang “Anti-Rabies Act of 2007,” nga gipasar aron sa pagsumpo sa pagkatap sa rabies dinhi sa Pilipinas.
Ubos sa maong balaod ang mga pet owners, labi na sa tag-iya sa mga iro, kinahanglan nga kanunay nga magpabakuna sa ilang iro og anti-rabies, magparehistro sa ilang mga iro ug magtinir og registration card sa ilang iro.
Kinahanglan nga hiktan ang iro sa tanang higayon ug di pasagdan nga mosuroy sa kadalanan nga way higot. Kadtong iro nga agresibo kinahanglan nga dunay muzzle o baatan ang baba kon dad-on sa gawas. Kinahanglan sab nga atimanon ang iro aron di kagiron.
Laing responsibilidad sa tag-iya sa iro mao nga motaho gilayon siya ngadto sa mga opisyales sud sa 24 oras human makapaak ang iyang iro ug pagtabang sa tawo nga napaakan sa iyang iro ug pagsagubang sa galastohang medical sa pagpatambal sa samad sa pinaakan sa iyang iro.
Kadtong tag-iya sa iro nga magdumili sa pagpabakuna sa iyang iro batok sa rabies multahan og P2,000, pabayron sa pagbakuna sa rabies sa iyang iro ug sa tawo nga mapaakan sa iyang iro.
Kadtong tag-iya nga magdumili nga ibutang sa obserbasyon ang iyang iro human kini makapaak og tawo multahan og P10,000. Kon di pa gyud siya mobayad sa medical expenses sa tawong napaakan sa iyang iro, multahan siya og P25,000.
Kadtong di mohigot sa ilang iro samtang gisuroy sa gawas sa panimalay multahan og P500. Ang tag-iya sa iro nga ma-impound multahan og di momenos sa P500 apan di molabaw sa P1,000. (edbarrita@gmail.com)