IPAHIGAYON sugod ugma hangtod sa Dominggo ang dry run diha sa bag-ong gibuksan nga Mambaling underpass diin pasudlon na ang mga bus ug mini bus. Kini human moreklamo ang pipila ka mga pasahero ug mga operators sa bus ug mini bus nga gidid-an gihapon sila sa pag-agi sa Mambaling area human gibuksan ang P700 million nga underpass niadtong Hunyo 15.
Ang reklamo sa mga pasahero nga nagpuyo diha sa highway ug Talisay area kay doble na ang ilang gasto kon mosakay sila paingon sa south kay moadto pa man sila sa South Bus Terminal. Unya og gikan sila sa south anha sila monaug sa Lawaan, Talisay ug mosakay na usab og lain sakyanan paingon sa highway. Lain na usab nga plite.
Pero nahibawo ba mo kon si kinsa ang nagmando nga dili paagi-on ang mga bus ug mini bus sa underpass? Si Konsehal Dave Tumulak diay, ang deputy mayor for police matter. Si Cebu City Transportation Office (CCTO) operations officer Francisco Ouano mao ang nagbutyag niini atol sa programang Dialogue on the Air sa dySS Super Radyo nga gidumala ni Super Lloyd Suarez. Miangkon usab si Tumulak niini sa dihang gikuhaan og reaksiyon.
Kay ang rason ni Tumulak mosamot katrapic kon tugutan nga paagion ang bus ug mini bus sa moang lugar. Nganong nakaingon man si Tumulak niini? Nganong nagtukod-tukod man ta anang maong mahal kaayo nga inprastraktura unya re-routing ra man diay ang sulbad sa grabeng traffic anang maong lugar?
Unsa may gahum ni Dave nga siya ra may nagbuot-buot nga dili paagi-on ang bus ug mini bus sa underpass? Ang CCTO adunay board nga maoy policy making body nga maoy mopagawas og mga desisyon kabahin sa mga traffic policy sa dakbayan. Unsa man gisugo siya sa outgoing mayor? Nganong wala man siya mokonsulta sa mga stakeholders (mga operators, pasahero ug ubang sektor nga naapektuhan sa maong desisyon)? Hinaot nga niining gipahigayon nga dry run ilang i-konsiderar ang resulta niini ug dili usa ka tawo lang ang modesisyon. (bobbygnalzaro@gmail.com)