NIADTONG Martes, gipasidunggan sa konseho sa dakbayan sa Sugbo ang tulo ka konsehal nga pulos nakahuman sa ilang tulo ka sunodsunod nga termino.
Ang 14th City Council, sa wala pa sugdi ang ilang regular session, midunol sa plaques of recognition ngadto kanila ni konsehal Margarita Osmena, Alvin Arcilla ug Sisinio Andales.
Ang umaabot nga mayor, si Vice Mayor Edgar Labella, ang nangulo sa kalihukan.
Gawas sa plaque of appreciation, si Andales gihatagan usab og laing pasidungog tungod sa iyang walay pagpalta sa regular session sukad pa niadtong 2010.
Ang tulo pulos kaalyado sa Bando Osmena Pundok Kauswagan (BOPK) nga gipangulohan ni Mayor Tomas Osmena, ang higpit nga kaatbang sa pulitika sa PDP-Laban-Barug, ang grupo ni Labella.
Napakita nila sa publiko nga taliwala sa mainiton nga panagribal makahatag usab sila og panahon nga ihikling ang pamulitika. Pasidunggan ang angay pasidunggan bisan unsa pay kolor niini sa pulitika.
Pero di ba ang pagdawat ni Arcilla ug Andales sa pasidungog nasukwahi sa ilang hugot nga pangangkon sa dihang nagpasubli sila og balik sa niaging piniliay.
Ang duha miinsister nga wa pa mapupos ang ilang tulo ka sunodsunod nga termino kay naputol kini sa ilang pagkasuspenso niadtong 2016.
Gani, bisan pa man og gi-disqualify sila sa Commission on Election (Comelec), mipasaka sila og motion for reconsideration.
Ning bag-o lang, si Arcilla napakyas sa pagkuha og temporary restraining order gikan sa Supreme Court samtang sa kaso ni Andales, padayon pa siyang naghuwat sa decision.
Sa ilang pagdawat sa plaka, buot ba ipasabot nga niangkon na sila nga napupos na gyud diay ang ilang termino nga sukwahi sa ilang gikombati sa korte? Ano ba talaga, kuya?