DUHA ka mga sundalo nga mga bakwit nga karon hingpit na nga mga sakop sa Armed Forces of the Philippines (AFP) ang gibulgar sab sa mga bakwit nga tapulan ug mga palahubog.
Gibutyag ni Jhunrey Hilogon, ang tigpamaba sa mga bakwit, nga karon nagpasilong sa simbahan sa Barangay Macasandig human gipapahawa Capitol Park nga unang-una dili sila sakop sa New People’s Army (NPA) sama sa pasangil sa mga kanhi bakwit nga sila Private Bernie ug Arante Calimhay.
Sila mibulgar nga mga sakop sa NPA ang bakwit ug nagsuporta kanila.
“Dili kana tinoud nga kami mga sakop sa NPA, Kana sila ni Bernie ug Arante mga tapulan kana sila. Gapananggot ug ilawom sa kalubian gainom dili gani makapalit og bugas. Mga palahubog man kana sila,” matud ni Hilogon.
Dugang ni Jhunrey nga naimpluwensyahan lamang pagmaayo kining duha sa mga mando ug sugo sa mga sundalo.
“Gipugos ra kana sila sa mga sundalo sa pagpasulti nga kami mga NPA,” dugang ni Hilogon kinsa unang giakusahan nga organizer sa NPA.
Samtang pipila kanila sama ni Datu Maghuhukom niingon nga walay kamatouran ang mga gipangsulti sa magsoung Calimhay gumikan kay kung sila sakop sa NPA dili na sila magpuyoay dinhi sa siyudad ug didto na sa kabukiran nagpuyoay.
Una na nga gibutyag ni Bernie ug Arante nga wala sila gipugos sa mga sundalo sa pagsulti sa kamatouran gumikan mas nakita nila kung unsa ka maayo ang tinoud nga gobyerno ug tinoud nga sundalo.
“Gusto nako sila matabangan nga mobalik sila sa sabakan sa gobyerno,” matud ni Arante.