MOKABAT sa 80 ka mga miyembro sa New People’s Army (NPA) ang mga nanurender dinhi sa lamang sa probinsya sa Misamis Oriental.
Kini ang gikumpirmar ni 58th Infantry Battalion (58IB) Commander Lieutenant Colonel Roy Derilo sa interbyu sa SunStar Superbalita.
Gibutyag ni Derilo nga tungod sa tinabanga sa komunidad ug lakip lokal nga kagamhanan napasurender kining mga sakop sa walhong grupo kauban sab ang pipila kanila nga adunay armas.
Dugang niini nga tungod sa mga surenderee mas iyang nasabtan ang ilang mga sitwasyon ug ang mga rason nganong misulod ug miusa sa walhong grupo.
Pagbulgar sab ni Derilo nga uwahing surenderer kanila mao ang magtiayon ug igsoun kinsa nasakit sa pasalig sa mga walhong grupo nga hatagan og pinansyal nga assistance ang nahibilin nila nga mga anak apan ang nahitabo walay tabang nga ilang nadawat ug nagkasakit ang ilang mga anak.
“Ilang nahibal-an through sa sulat nga ilang mga anak walay kaon. Ang pasalig nga suporta gikan sa NPA wala mahatag ug dili sila kagunit og celphone aron wala silay komunikasyon sa ilang pamilya,” matud ni Derilo.
Dugang ni Derilo nga kining mga surenderee ang makadawat og benipisyo sa gobyerno nga Enhanced Comprehensive Local Integration Program (E-Clip).
Kung aduna sab kwalipikado kanila nga mamahimong sundalo andam sab kini nilang dawaton aron ipaubos og training.