GIPAHIMANGNOAN sa Regulatory and Complaint Board (RCB) nga mapriso kadtong masapon nga maghimo og malay-aw nga butang sulod sa mga pampublikong dapit sama sa movie houses ug uban pa.
Nasayran nga nagpahigayon og inspeksiyon niadtong Hunyo 25 ang tinugyanan sa RCB lunot na usab sa kampanya batok sa mga patigayon ilabi na sa kontorbersiyal nga nikatap nga sex video sa mga menor de edad.
Gibutyag ni abogado Edgardo “Egay” Uy nga angayang hinumdoman sa mga patigayon ug ni bisan kinsa nga dunay silot ang maghimo og mga dili maayong butang lakip na ang pakighilawas sulod sa mga pampublikong patigayon ubos sa Republic Act 7610 anti-child abuse.
“Kung dunay dili maayo nga nahitabo sa ilang premises, dunay presumption nga gipromote, gi-allow, gi-tolerate kana nga mga panghitabo, posible nga pwedi nga isara ang ilang establisimento immediately for a period of not less than one year, dako na nga kawad-on nila sa ilang negosyo plus duna pay criminal liabilities,” matud ni Uy.
Gidugang pa nga dili lamang ang establisemento ang mag-atubang og silot apan lakip na ang masapon nga maghimo og mga dili maayong butang sulod sa movie houses o sa pampublikong dapit.
“Gani kadtong maghimo sa ingon ug kining mga gidili sa atong movie houses,maski of age na sila maigo gihapon sila sa article 201 sa revise penal code nga ang penalty diha 6 years to 12 years imprisonment plus fine nga of P20,000 or not more than P200,000,” dugang niini.
Nagpahimangno kini nga motuman sa mga gi-implementar nga balaod sa siyudad tungod kay ang RCB dili kini anti- business ug gani nagpromote pa kini sa mga patigayon nga mga nagtuman ug nitabang aron nga maprotektahan ang mga kabataan ilabi na ang mga menor de edad.