PATAY ang helper human kini naipit dihang nibangga ang sakyanan niadtong Hunyo 25 sa gabii diha sa Purok 7, Upper Puerto, Barangay Bugo, dakbayan sa Cagayan de Oro.
Naila ang biktima nga si Alvin Pomar kinsa residente sa Panabo, Davao del Sur ug giingong helper sa boom truck ug mas napurohan atol sa panghitabo samtang dunay laing mga biktima ang nakaangkon og minor injuries.
“Ang katong truck nagdala siya og metal concrete kanang sa poste; bug-at iyang dala. Iyang brake system daw nag-malfunction pa going down so murag iyang defense is iyang ibangga, so ang nahitabo daghan iyang nagasgasan,” matud ni John Ross Escoltos sa EMS.
Sa nahipos nga impormasiyon, giingong naguba ang brake sa boom truck hinungdan nga gituyo sa pagbangga apan ubay-ubay nga mga sakyanan ang nabanggaan ug nagrabehan mao ang Mitsubishi nga kargado og mga kalabasa.
“Ang nagrabehan niya og bangga ang Mitsubishi loaded with squash, nabangga, natagak ug ang boom truck gituyo og bangga para ma brake, ang isa katong bata naipit iya daw tong papa ang helper pud,” dugang ni Escoltos.
Na-ipit ang helper ug singko anyos nga batang lalaki diin miresulta kini sa kamatayon sa helper nga si Pomar.
Naglisod usab sa pagkuha ang tinugyanan sa urban search and rescue lakip na ang City Risk Reduction and Management Department sa mga biktima nga naipit apan swerteng naluwas ra ang maong bata.
Sa pagsulat niini nga balita, padayon pa nga giimbestigahan ang insidente samtang nagpaalim pa ang mga biktima ug nagpabilin pa sa dapit ang sakyanan nga nahulog atol sa panghitabo.