WALO ka mga samad pinusilan ang naangkon sa usa ka lalaki human gipusil kagahapon mga alas 4:25 sa kaadlawon niadtong Miyerkules, Hunyo 26 sa Valenzuela Road, Agora, dakbayan sa Cagayan de Oro.
Patay ang biktima nga si Rudillo Baldo, 20, taga Water fall Balingasag, Misamis Oriental ug trabahante sa fish cage sa Barangay Gusa ning dakbayan.
Sa pakighinabi kang Police Major Julius Clark Prisco Macariola, hepe sa Police Station 3 (PS3) sa Agora, gibutyag niini nga base sa nakasaksi nga usa lamang ka tawo ang nibira kang Baldo apan gisuta pa ang kamatooran niini pinaagi sa pagsusi sa closed-circuit television (CCTV) camera sa dapit.
Gituohang gidul-itan pagpusil ang biktima.
“Naay nakita ang Soco nga walo ka samad pero ang nakita lang nato nga basiyo, i-determine pa ni kung ang uban nga samad is exit ba or entrance ba, accordingly 9mm ang mga basiyo nga nakita,” matud ni Macariola.
Nanawagan usab kini sa mga nakasaksi nga modangop sa ilang buhatan aron nga masuta ang motibo pagpatay sa biktima.
“Naa na tay initial but di pa nato pwedi ma divulge, personal, dili drug related, accordingly nag inom sa Gusa niadto sa Gusa nagtiwas og inom kay naa daw katagbo,” dugang ni Macariola.
Ang patay nga lawas ang gidala na sa Bollozos Funeral Homes sa Bulua samtang nagpadayon ang imbestigasiyon sa mga otoridad.