ANG 56th Infantry Batallion mopasaka og tukmang kaso batok sa New People’s Army (NPA) kinsa padayong nang-rekrut sa kabukiran sa Talaingod.
Subay sa impormasyon gikan sa Armed Forces of the Philippines (AFP), sa kasamtangan padayon silang nakig-koordinar sa Talaingod Municipal Police Station aron ipasaka ang kaso batok sa mga lider sa NPA nga padayong nang-rekrut og mga menor de edad aron paapilon sa kalihukan.
Sa miaging semana, mitahan sa 56th IB ang usa ka menor de edad nga gitago sa alyas nga Melanie, 14-anyos, nga taga Brgy. Dagohoy, Talaingod, Davao del Norte.
Segun sa taho nga nagsilbi kining medic sa Andoy platoon sa Sub-Regional Guerilla Unit, Sub-Regional Committee 5, SMRC, NPA.
Gisaysay sa mitahan nga batan-on nga duna pay mga menor de edad nga anaa na sa kalihukan sukad sa iyang pagbiya sa grupo.
Bulan sa Oktubre sa miaging tuig, miuban ang nasampit nga batan-on sa kalihukan dihang misalig sa mga saad nga tabangan ang iyang pamilya gikan sa pait nga kahimtang.
Ning kasamtangan ang batan-on anaa sa pagkustodiya sa Municipal Social Welfare and Development Office (MSWDO) sa Talaingod aron ipailawom sa psychological intervention. (Jeepy P. Compio)