COMMUNITY-based intervention program sama sa community Kitchen alang sa mga libud-suroy nga mga bata, ang mobile kitchen nga maoy sagad nga dali ipadala kon adunay mga trahedya ug kalamidad alang sa inisyal nga tabang.
Apil na kontrobersyal nga Hinabang sa Edukasyon, Livelihood ug Panlawas kon HELPS program ug ang pending nga Biometric program alang sa mga libud-suroy nga mga bata, ang buot unta sa outgoing nga pangulo sa City Social Welfare and Services (CSWS) sa Mandaue City nga mapadayon sa bag-ong administrasyon.
Usa sa nag-una nga departamento diha sa paghatag sa serbisyo sa outgoing administration nila ni Mandaue City mayor Luigi Quisumbing ug Bise Mayor Carlo Fortuna, mao ang buhatan sa City Social Welfare Services.
Human sa matag panghitabo sama sa sunog, sa 1st alarm pa lang, anaa na ang pipila ka kawani sa CSWS aron maoy moapud-apud og tubig sa mga bombero ug rescuer.
Ang dali usab nga pagpadala sa mobile kitchen, bisan pa gani sa silingang’ mga lungsod ug siyudad.
Sama nalang sa nahitabo nga landslide sa siyudad sa Naga sa niaging tuig, usa kini sa naghatag og mga lutong-bahay ug mga lugaw sa mga rescuer, human nga duha sa unom nila ka mobile kitchen ang gipadala.
Moabot na usab 25 ka mga libud-suroy nga kabataan ang wala nay palta sa pagtungha sa rason nga walay kaon, kini pinaagi sa tabang sa community kitchen nga gisugdan sa miaging tuig diin ang CSWS ang mohatag og lutuonon, apan ilang ginikanan ang moluto., pagsiguro nga dili gyud magutman ang mga bata.
Ug nga sa matag weekend, 150 ka mga libud-suroy nga mga bata gikan sa upat ka barangay, Guizo, Looc, Bakilid ug Paknaan, uban kanila ang mga ginikanan ang gipaubos sa values formation.
Usa kini sa rason nga niminus ang makita nga mga libud-suroy sa siyudad sa Mandaue.
“We really push on the advocacy og community-based intervention program, mao ng nagtukod ta og community kitchen to few areas in the City,nga I hope unta nga mapadayon kay that is very effective..,” pasabot ni Perez.
Anaa usab ang HELPS, ang mga benepisyaryo, ngadto nalang sa barangay level makakuha sa ilang gikinahanglan nga tabang, diin sukad sa tuig 2017 hangtud sayo ning tuiga, aduna nay 20 mil ang nakabenepisyo.
Laing gisugdan nga proyekto sa CSWS nga gipanghinaot nga ipatuman pa sa mosunod nga mangulo sa buhatan mao ang Biometric program.
Kadtong mga libud-suroy nga na-rescue o children at risk ug Children in conflict with the Law mahibaw-an na ang background, ilabi na kalabot sa pamilya. (FMD)