DAGHANG board members, ilabi na ang mga bag-ong sakop sa Hunta, ang wala motambong sa laing tigum nga gipatawag ni outgoing governorHilario Davide III kagahapon sa hapon, Hunyo 26.
Nunot niini, wala gihapoy kaugalingon nila nga house rules ang umaabot nga 15th Sangguniang Panlalawigan, nga mohimo sa ilang inaugural session sa Hulyo 1.
Gitug-an sa Provincial Board Secretariat nga unom lang ka board members ang nitambong sa laing tigum nga gipatawag ni Davide, ang umaabot nga bise gobernador.
Kini mao silang Bokal Tata Salvador, Jerome Librando, Miguel Magpale, Tata Corominas-Toribio, Raul Bacaltos ug SK Federation President Jericho Rubio.
Matod ni PB Secretary Pulchra Acevedo nga si Davide maoy ikapito sa mga nitambong.
Gikan sa 9 nga wala nitambong sa unang tigum, nahimo na kining 11. Sigun ni Acevedo, ang maong mga PB members, lakip na ang mga bag-ong napili, dunay lain-laing rason sa ilang pagpalta.
Subli hinuong giklaro ni Acevedo nga dili kini makaapekto sa legislative function sa mga bokal.
Ubos sa Local Government Code, mahimo pa hinuon nga magmugna sa ilang house rules ang mga bokal atol sa ilang labing unang sesyon o 90 ka adlaw gikan niini.
“Under the Local Government Code, it’s provided there that during the inaugural session or withing 90 days thereafter, that’s the time that they adopt or update their internal rules. We just get used by the past nga ready na siya ahead of time so during the inaugural (session), it’s for adoption and approval na lang,” niingon si Acevedo.
Sa pagpahigayon sa inaugural session, gitug-an ni Acevedo nga bugtong malakip sa agenda ug maoy atimanon, mao ang adoption ug approval sa house rules ingun man ang pagpili o pagtudlo ug mga chairman ug mga sakop sa nagkadaiyang komitiba. (AZLG)