USA sa mga nitulis-patay sa Fil-Chinese nga negusyante sa dakbayan sa Mandaue niadtong Father’s Day, ang gihimuan na og cartographic sketch, diin naila kini nga sakop sa Ozamis robbery group.
Usa sa mga anak sa gipatay nga negusyanteng si Yifeng Guo Yang, ang nakakita sa panagway sa usa sa upat ka mga tulisan. Kini human nga gawas nga ang driver’s side ang giablihan sa mga mamumuno, lakip usab sa giablihan ang passengers’ side.
Diin giingon nasumbagan pa sa usa sa mga biktima ang usa samga mamumuno. Nakita ang panagway niini, human wala na ang helmet.
Nagtuo si Police Colonel Julian Entoma, direckor sa Mandaue City Police Office (MCPO) nga ang itom nga helmet nga nakuhang’ ebidensya sa crime scene, iya sa maong tulisan nga nakita sa mga biktima.
Hinungdan nga 100 porsyento na ang kapulisan nga nakakompirmar nga pagpanulis ang punterya sa grupo.
Matud ni Entoma nga sa gipahimuan na og cartographic sketch, naila nga usa kini sa mga giila usab nga suspetsado sa pagpanulis sa mga establisemento sa lungsod sa Liloan ug Consolacion, Oktubre sa miaging tuig, diin giila kini nga sakop sa Ozamis robbery group o Kuratong Baleleng.
Dugang ni Entoma nga giila na lang ang pangalan sa maong suspetsado.
Samtang planado ang gihimo nga pagtulis human nasuta sa mga pulis nga usa sa mga CCTV camera sa barangay hall sa Cubacub, nga gipahimutang sa crossing sa barangay Casili ug Cubacub, ang giguba, duha ka adlaw sa wala pa ang hitabo sa pagpamusil ug tulis sa negusyante sa naasoy nga dapit. (FMD)