MOTAMBONG na si Governor-elect Gwendolyn 'Gwen' Garcia sa gitakda nga turnover ceremony gikan sa Davide administration paingon sa iyang pamunuan ugmang adlawa. Kini human niuyon ang kampo ni outgoing governor Hilario Davide III nga isibog kini sa mas sayo nga oras.
Alas 10:00 sa buntag unta karong Hunyo 28 ang orihinal nga skedyul sa turnover hinungdan nga una nang niingon ang kampo ni Garcia nga dili siya makatambong tungod sa ipahigayon usab niini nga thanksgiving mass.
Apan dihang gihangyo usab sa transition team ni Garcia ang kampo ni Davide nga isibog kini sa alas 9:00 sa buntag aron makatambong siya, nisugot ra usab sila.
Matod ni Atty. Manolette Dinsay sa Garcia transition team, nga human sa turnover, molahos dayon si Garcia sa misa ug sa gitakda usab niya nga oath taking ugma sa hapon sa usa sa mga hotel sa dakbayan sa Sugbo.
“Friday (June 28) ang oath taking and then she also intends to attend the turnover. Ni-request man ang team ug 9 am unya gi-grant man nila. Gikan ana, motabok siya (Garcia) sa iyang oath taking,” niingon si Dinsay.
Sa laing bahin, ang oath taking ceremony ni Davide alang sa pagka-bise gobernador himuon sa Hunyo 30 sa buntag, diin si outgoing vice governor Agnes Magpale ang mo-administer niini.
Nasayran, nga limitado ang gidapit sa maong oath taking ni Davide, nga ipahigayon sa usa sa mga restaurant sa dakbayan sa Sugbo.
Sa hapon sa susamang adlaw, himuon ang inauguration ceremony ni Garcia sa Capitol Social Hall.
Gipaabot nga magkita ang duha sa Hulyo 1 sa hapon, atol sab unya sa inaugural session sa 15th Sangguniang Panlalawigan, diin si Davide ang presiding officer.
Kini human gipadalhan na ug imbitasyon sa Provincial Board Secretariat si Garcia ug gipaabot nga mopadangat kini ug mensahe alang sa 15th SP. (AZLG)