DUL-AN P230 milyones ang nawagtang nga kwarta sa Cebu City Government gumikan sa kapakyas niini sa pagkolekta sa real property tax sa mga poste ug transformers sa Visayan Electric Company (Veco).
Kini ang bana-bana ni outgoing City Assessor Raul Bitoon sa 16 ka tuig nga buhisanan sa Veco gikan sa 1992 hangtod 2008.
Ang kantidad di na mahimong makolekta sa Siyudad sanglit ilawom sa Section 222 sa Republic Act 7160, gidili kini kon lapas na sa 10 ka tuig ang real property unit (RPU) nga gideklarar, apan wa masingil.
Iyang gipasabot mao ang mga poste sa kuryente ug transformers sa Veco nga gideklarar karong tuiga ug giduso sa iyang buhatan.
Kay karon pa mang 2019 naningil ang Siyudad, ang masingil ra niini nga buhis mao ang gikan sa 2009 hangtod ning tuiga.
Base sa assessment sa buhatan ni Bitoon, niabot ngadto sa P134 milyones ang bayranan sa Veco sa ilang RPT sa 35,249 ka poste ug 7,491 ka transformers gikan sa 2009 hangtod 2019.
Laing P73.89 milyones nga bayranan sa Veco subay sa ilang daan nga deklarasyon sa mga poste ug transformers gikan 1992 hangtod 2019, apil na ang interest diin wa matino ang gidaghanon sa poste ug transformers.
Pasabot nga ang bayranan sa Veco moabot lang og P208 milyunes.
Ang gibasehan ni Bitoon sa P230 milyunes nga na-waived sa City Government gumikan sa provision sa Local Government Code of 1991 mao ang ilang bag-ong deklarasyon, base sa dokumento nga giduso sa Veco.
“The P134 million has not been paid by Veco because we did not issue the assessment at saka iyong P73.89 milion has not been paid because we never collect the amount,” padayag ni Bitoon.
Si Bitoon nagkanayon nga napadala na nila ang bag-ong assessment.
Dunay 60 ka adlaw ang Veco nga mo-question sa assessment sa City Hall. Ang Veco nipadayag sa ilang kaandam pagsulbad sa ilang buhisanan ug mobayad sa ilang buhis sa Siyudad.
Si Labella kinsa molingkod na pagka-mayor sugod Hunyo 30, nagkanayon nga pakyas ang nangaging mga administrasyon sa pagkolekta sa hustong buhis gikan sa Veco.
“This is a wake-up call and this may not only be an isolated case. There are others who’s taxes were not collected. I will issue a memorandum to the City Assessor to make a rigorous approach on the assessment of all the existing establishment so that appropriate RPT will be paid,” padayag ni Labella.
Dugang ni Labella nga mohimo og tax mapping ug profiling ang City Assessor’s Office sa mga real property units sa Cebu City.
Gipadayag ni Labella nga dakong hagit sa sunod nga city assessor sanglit gipadayag ni Bitoon nga 40 porsiyento ra ang efficiency sa City Government pagkolekta sa RPT gikan sa 280,000 ka RPU sa dakbayan sa Sugbo.