Patay sa patas-anay og utong

PATAS-anay og utong maoy hinungdan sa kamatayon sa lalakeng hubog atol pagpangligo sa usa ka spring atol sa kapistahan ni San Juan niadtong Lunes sa alas 4:15 sa hapon, Hunyo 24, sa Brgy.Candagit, lungsod sa Sibonga.

Si Vicente “Manoy” Patalinghug Jr., 27, dunay kapuyo, dead-on-arrival (DOA) sa tambalanan sa dapit dihang gidala sa iyang mga kabanay ug higala.

Si Police Chief Master Sgt. Inocentes Amistad, sa Sibonga Police Station nga nahinabi sa Superbalita Cebu, nagkanayon nga ang hitabo uwahi nga na-report sa kapulisan kay pagka Hunyo 25, sa alas 8:45 sa buntag.

Usa sa ilang imbestigador nga si Police staff Sgt. Joseph Alidon niimbestigar ug naabtan niya si Patalinghug sa Saint Peter Funeral Parlor sa Dakbayan sa Carcar.

Sa imbestigasyon ni Alidon, naligo sila si Patalinghug uban sa iyang mga higala.

Niapil si Patalinghug, kinsa lakip sa sab nga ni-imom, sa ilang contest nga patas-anay og utong sa pagsawom.

Apan nahibulong ang iyang mga kauban nga wa na siya motunga hinungdan nga ilang gisuhid sa pagsawom.

Nakugang sila kay didto sa ilawom sa tubig, nasabod na si Patalinghug sa mga gamot sa mangroves.

Wa na kini panimuot sa ilang paghaw-as.

Sa ilang pagdala sa tambalanan sa Sibonga, patay na kining niabot. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph