SUPERBALITA CEBU

CCMC dako pag kuwang

INSPECTION: Si Cebu City incoming Mayor Edgardo Labella (wala) nga gi-interview ni Superbalita Cebu reporter Philip Cerojano (tuo) sa dayon niyang pagsulod sa padayong gitrabaho nga 10 ka andanang Cebu City Medical Center (CCMC). Nakurat si Labella human makita ang kahimtang sa sud sa edipisyo nga di pa magamit ning tuiga. (Alan Tangcawan)

DI PA magamit ang unang tulo ka andana sa bag-ong Cebu City Medical Center (CCMC) karong Septiyembre subay sa ocular inspection ni Mayor-elect Edgardo Labella sa Miyerkules, Hunyo 26.

Ang umaabot nga mayor nagkanayon nga nagkinahanglan og dugang P1 bilyon ang CCMC para mahuman ang 10 ka andanang edepisyo.

Ang konstruksyon nagkinahanglan pa og dugang usa ka tuig para makumpleto.

“We thought all the while as promised by the outgoing administration (of Mayor Tomas Osmeña) that it will be opened by April. It was postponed to May and eventually moved to September, when the original opening was December in 2018. But the real status of the building is it cannot be finished by the end of this year,” paghulagway ni Labella.

“It takes another year but it needs also another P1 billion to finish the entire facility. And I was shocked with the assessment of the contractor and the city engineer,” dugang sa outgoing vice-mayor.

Si Labella niingon nga sa ground floor ug sa ikaduhang andana sa kasamtangang unom ka andanang edepisyo, aduna nay mga finishing touches sa mga lawak.

Apan sa ikatulong andana hangtod sa ikaunom, daw pulos pa pader ang makita.

Iyang gipadayag nga inig lingkod na niya isip mayor sugod Hunyo 30, mao kini ang iyang hatagan og prayoridad.

Mangayo siya og budget gikan sa Konseho nga pangulohan unya ni Vice Mayor-elect Michael Rama, kinsa maoy nangusog niadtong mayor pa siya niadtong 2015 para matukod ang tambalanan.

Si Labella nagkanayon nga adunay kwarta ang Cebu City ug angay nga hatagan kini og pagtagad ug di magbinasolay kon si kinsa ang angay manubag sa kalangan sa paghuman sa pasilidad.

“Let us stop pointing fingers and there is no time for that. But we shall take the appropriate action to finish the construction of CCMC,” dugang sa umaabot nga mayor.

Sa 2016, nalangan og pipila ka buwan ang construction niini human gipahunong ni outgoing Mayor Tomas Osmeña gumikan sa isyu sa building permit.

Gasto misobra

Ang P1 bilyon maoy igasto para paghuman sa 10 ka andana.

Kon kini mabutangan og pundo, mahimo nang P1.847 bilyones ang gasto sa pasilidad gikan sa orihinal nga P1.5 bilyones niadtong 2014 dihang giplanohan kini nga tukoron.

Ang ospital adunay 200-bed capacity. Ang City Government nigasto na og P564 milyones para sa first phase ug laing P283 milyones sa second phase sa proyekto.

Kini naglakip sa pag-istalar sa utilities, plumbing, electrical, fire protection, mechanical, communication ug structural finishes.

Human sa ocular inspection ni Labella sa construction site, nilargo ang mayor sa temporaryong CCMC nga nahimutang sa building sa Bureau of Fire Protection.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph