SUPERBALITA CEBU

Liboan nawad-ag balay

KAPIN sa 1,000 ka mga pamilya o labing minos 4,000 ka mga tawo ang nawad-an sa ilang balay tungod sa sunog sa Barangay Tipolo, Dakbayan sa Mandaue, Huwebes sa kaadlawon, Hunyo 27.

Gisusi pa sa imbestigador sa Bureau of Fire Protection (BFP) kon unsay sinugdanan sa kayo, charger ba o linung-ag nga gibiyaan sulod sa usa ka lawak sa ikaduhang andana sa balay diin nagsugod ang sunog.

Gitug-an ni SFO2 Edgar Vergara, fire investigator sa Mandaue City Fire station, nga sa pasiuna nga pakisusi, nagsugod ang kayo sa ikaduha nga andana sa balay sa magtiayon nga Mariano ug Alma Conchas.

Giingon nga gipaabangan sa laing magtiayon ang usa sa mga lawak sa ikaduha ka andana nga hinimo sa mixed sa kongkreto ug light materials.

Nakita sa magtiayong Conchas nga nag-aso ug nasunog na ang lawak, apan wa diha ang magtiayong nag-abang kay parehong nagtrabaho.

Giingon nga nabiyaan nga gi-charge nga cellphone o giingon nga giluto ang hinungdan.

Apan matod ni Vergara nga mao pa kini ang ilang gisusi ug gipangita pa ang magtiayon aron pagkompirmar.

Gideklarar kini nga fire out alas 9:12 na sa buntag. Way gikataho nga namatay o naangol.

Nagsugod ang sunog sa sitio Basubas, ug nitapon sa mga sitio Maharlika ug Espina compound.

Nadawat sa kabomberuhan ang alarma sa sunog ala 1:18 Huwebes sa kaadlawon, Hunyo 27. Giisa sa Task Force Bravo alas 2:34 sa kaadlawon ug gideklarar nga nakontrolar alas 3:30 na.

Gibana-bana sa kabomberuhan nga mokabat sa P1.3 milyones ang danyos.

Nasayop

Si Allen Etcuban, 43, niingon nga 33 ka tuig na siya nga nagpuyo sa sitio Maharlika, apan karon lamang siya kasuway nga nasunogan.

Matod niya gipukaw siya sa iyang anak nga miingon nga adunay sunog sa Basubas.

Wa siya magdahom nga maabot kini sa ilang balay.

“Ikapila na baya na nasunog ang Basubas. Wala gyud mi nag-expect nga maabot sa amoa. Pero tungod sa kakusog sa hangin, nangandam sad mi,” dugang ni Etcuban.

Nangindahay silang mahatagan og trapal sa kagamhanan aron adunay mapasilongan.

Si Lee, usa ka estudyante nga taga sitio Basubas, niingon nga ang ilang pinuy-anan likod ra sa balay diin nagsugod ang sunog.

Matod niya ang iyang nadala usa lang ka uniform ug mga papeles sa eskwelahan.

Ang 23-anyos nga babaye niingon usab nga hapit niya mabiyaan ang iyang 4 anyos nga anak tungod sa karatol.

Maayo na lang kay gipangitaan siya sa iyang bana.

Nag-ampo

Maugdaw man ang ilang balay, ampo niya sa dihang nakita nga mas nagkaduol na ang ka’yo sa ilang balay, nga dili lang maapil sa pagkasunog ang kapilya ni Sr. Sto. Niño, nga anaa tupad sa ilang balay.

“Masunog naman gyud among balay, ako gyud giampo pag-ayo, nga dili lang maapil ning kapilya. Ako gyud gihalog ang Sto. Niño, kay maayo nalang ning kapilya amo tawn kapasilungan,” kahilakon nga saysay ni Ester Estrera, 58, sa Superbalita Cebu.

Giangkon ni Estrera nga wala dayon sila nanghipos ug nigawas sa ilang balay sa dihang niulbo ang sunog sa sitio Basubas, sa pagtuo nga mapalong ra kini dayon.

Apan human ang 40 minutos, diha na sila na-rattle ug nagdali sa pagpagawas sa mga apo ug ubang kabanay ni Estrera ug pipila ka mga sinena ug gamit lang ang nadala.

Sila si Estrera lakip sa kapin sa 1,200 ka pamilyahan nga naapektuhan sa pag-ulbo sa kayo sa tulo ka sitio.

Matod sa kapitan sa Tipolo,Romana Cuizon, dul-an sa 500 ka mga balay ang hingpit nga naugdaw.

Nakan-an usab sa kayo ang stock room sa San Miguel Beer, lakip na ang lima ka lawak saringan ug ang mga wellness room, tool room ug library sa Tipolo National High School.

Si Cuizon niingon nga ang mga biktima anha una ipahiluna sa gawas sa Cebu International Convention Center (CICC).

Ang uban sa San Roque Gym ug Tipolo Elementary School.

Hatagan nila kini og tent ug uban pang gikinahanglan

Niawhag usab si Cuizon sa publiko sa pagtabang sa mga biktima sa pag-donate og pagkaon, tubig, senina, tambal ug bisan unsa nga pwedeng magamit sa mga nasunogan.(Alang sa mga video sa sunog, tan-awa sa Facebook page sa Superbalita Cebu.) (FMD, Leonor Jorge ug Jessa Mae Genobisa, CNU Comm Interns)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph