KINSA man ang mayoriya sa Cebu City council inig-abut sa Hulyo 2. Ang Bando Osmena-Pundok Kauswagan (BOPK) o ang Barug PDP-Laban? Importante kini alang sa duha ka partido kay nianang adlawa magpili na sila og mga chairman ug mga sakop sa nagkalainlaing komitiba sa konseho. Sa pagka-karon ang BOPK aduna pay 11 ka mga sakop samtang ang Barug-PDP Laban anaa lamay pito. Mausab lang ang kamada kon makapakanaug na ang Commission on Elections (Comelec) og writ of execution nga magtangtang kang Konsehal Alvin Arcilla sa pagka-konsehal. Gila-uman usab sa administrayon ni incoming Mayor Edgardo Labella nga mao usab ang dangatan ni Konsehal Sisinio Andales, nga sama ra ang kaso kang Arcilla. Kon matuman na kini mulingkod na si Konsehal Jerry Guardo puli kang Arcilla ug si Konsehal Joel Garganera puli kang Andales. Unya kay si Guardo mipahibawo naman nga mutapon sa grupo ni Mayor Labella, mahimo nang 9 por 9 ang gidaghanon sa duha ka partido. Apan mipahibawo na man usab si Konsehal Dave Tumular nga mobali sa administrasyon, molabaw na ang Barug PDP-Laban sa 10 samtang mominus ngadto sa walo ang mga sakop sa BOPK.
Apan kinahanglang mahitabo kining maong sitwasyon sa dili pa ang inaugural session sa konseho karong Hulyo 2 diin magpili na usab sila og mga chairman ug mga sakop sa nagkalainlaing komitiba sa konseho. Kon dili mausab ang kamada walay sakop sa Barug nga makahupot og chairmanship bisan gani sa pagka-member sigun sa gipahibawo ni Konsehal Andales. Nagtuo man gud ang kadaghanan nga kon makapili na ang mga konsehal sa mangulo ug mga sakop sa nagkalainlaing komitiba nga dili na kini matu-is gawas sa two-thirds vote sa mga sakop sa konseho.
Ambut og unsaon pagkalaki sa kadagkuan sa Barug PDP –Laban aron ilang ma-ilug ang mayoriya ? Maka-isyo na kaha og writ of execution ang Comelec sa kaso ni Arcilla? Gipaabut nga makapakanaug na og resolution ang Comelec en banc sa kaso ni Andales apan dili pa siya matangtang hangtud sa Hulyo 2. Dili kaha madani ang ubang mga sakop sa BOPK sa pagbali ngadto sa Barug PDP – Laban bugti sa executive function nga gisaad ni Mayor Labella ngadto kanila? Murag hilum man kaayo ang chairman sa Sangguniang Kabataan. Dili kaha siya mobali sa administration party? Ako nagtuo nga adunay daghang naghunahuna nga mobali apan mauwaw silang tawgon nga balimbing.
•••
Gikalipay sa mga negosyante sa Mandaue City ang pagdaug ni Kongresista Jonas Cortes isip mayor sa siyudad. Gipaabut nila nga mobalik na ang business-friendly atmosphere sa Mandaue City sama sa miaging Cortes administration. Nabalaka ug nahadlok sila sa administrasyon ni Mayor Luigi Quisumbing tungod kay nagtuo sila nga inay tabangan gilisudlisod na hinuon sila. Ilang gihimong ehemplo mao ang pagsira sa usa ka negosyo sa iya mismong pariyente ug sa Big Hotel. Tungod niining palisiya ni Mayor Cortes kalabut sa mga negosyante gipaabut nga daghan ang investor nga mobubo og puhunan sa Mandaue City. (mannyrabacal1144@gmail.com)