SUPERBALITA CEBU

Barrita: Duha ka proyekto

Tikdul-tikdol

ADUNAY duha ka mga dagkong proyekto dinhi sa syudad sa Sugbo--ang usa magamit na samtang ang usa di pa. Di pa magamit ang unang tulo ka andana sa napulo ka andana nga bag-ong Cebu City Medical Center (CCMC) building sa Natalio Bacalso Avenue.

Samtang magamit na ang duha ka lane nga underpass sa Natalio Bacalso Avenue gihapon, dapit sa Barangay Mambaling, syudad sa Sugbo. Ang maong proyekto gikan sa kagamhanang nasyonal mobalor og kapin sa P700 milyunes.

Gipabarog ang bag-ong CCMC building sa nahimutangan sa karaan nga ospital nga naguba sa 7.2 magnitude nga linog niadtong Oktubre 15, 2013. Ang underpass gitukod aron maluag ang kahuot sa trapiko sa Mambaling.

•••

Si Cebu City Mayor-elect Edgardo Labella, sa iyang occular inspection sa bag-ong CCMC building niadtong Miyerkules, Hunyo 26, niingon nga nagkinahanglan pa og dugang P1 bilyon para mahuman ang 10 ka andanang edepisyo ug molanat pa kinig usa ka tuig.

Ang bag-ong CCMC gibana-bana nga mogasto og P1.5 bilyones. Ang kagamhanan sa syudad nigasto na og P564 milyones sa first phase ug P283 milyones sa second phase, lakip sa pag-instalar sa utilities, plumbing, electrical, fire protection, mechanical, communication ug structural finishes.

Sa pagtiwas sa napulo ka andana moabot ang gasto ngadto sa P1.847 bilyones sa building nga karon unom pa lang ka andana ang nahuman. Di makatibhang sa P8.3 bilyones nga downpayment sa nakapalit og mga lote sa South Road Properties (SRP).

•••

Samtang sugdan karong adlawa, Hunyo 27, ang dry run sa pagpa-agi sa mga pampublikong sakyanan sa underpass sa Mambaling aron masayran kon makasulbad ba gyud ang maong infrastructure sa kahuot sa trapiko sa maong dapit.

Atol sa construction sa maong underpass ang mga pampublikong sakyanan nga nagbiyahian sa habagtang bahin sa lalawigan sa Sugbo didto paagia sa SRP tungod kay gisirad-an man ang maong dapit.

Si Julie Flores, vice mayor-elect sa lungsod sa Barili ug pangulo sa Cebu Probincial Bus and Mini Bus Operators Transport Cooperative, niingon nga hayan mahimo na kining dry run, forever.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph