Editoryal: Kalbaryong CCMC

Editorial Cartoon by Enrico P. Santisas
Editorial Cartoon by Enrico P. Santisas

MAKATULO na napalpak ang gitakda untang pagbukas sa unang tulo ka mga andana sa Cebu City Medical Center (CCMC). Nipahibawo ang administrasyon ni Mayor Tomas Osmeña nga niadto untang Marso buksan. Ikaduha na kadto ka higayon nga palpak ang target.

Karon na usab untang Septiyembre ang plano pagbukas sa unang tulo ka mga andana. Apan di na usab kini madayon.

Niadtong Miyerkules sa hapon, si Edgardo Labella, ang umaabot nga mayor, niduaw sa gitrabahong edipisyo aron tan-awon ang kahimtang niini.

Nakurat si Labella sa iyang nakita kay dako pa ang trabahuon sa unang duha ka mga andana, nga matod niya, sa sunod tuig pa magamit.

Ang target nga P1.5 billion nga galastuhan sa pagtukod sa 10 ka andanang edipisyo misaylo kay hayan moabot na kini og P1.8 billion. Mao kini ang nasuta ni Labella human siya niduaw sa building. Mahuman ang building, apan gikinahanglan ang dugang P1 billion.

Matod niya dunay kwarta ang Siyudad sa pagpahuman sa ospital. Bitaw, naa may P8 billion kapin nga pasiunang bayad sa mga developer nga nakapalit og mga luna sa South Road Properties (SRP). Magamit kining kwartaha pagtiwas sa building, inay pakatulgon lang sa banko.

Ang paghuman sa ospital mopagaan sa kahimtang sa kabos nga mga pasyente nga nanag-antos sa temporaryong tambalanan nga naa sa edipisyo sa Bureau of Fire Protection (BFP). Nasuta ni Labella ang kapait sa kahimtang sa mga pasyente.

Ning higayuna, di na angay pang maglalis asa og kwarta kay naa man. Kon maglalis pa, ang mga kabos nga nahikawan sa serbisyo sa kagamhanan mag-antos pag maayo.

Sakto si Labella, wa nay angay nga magbasulay kon kinsa ang nakalangay. Ang importante mahuman na ang tambalanan nga dako kaayo og ikatabang sa mga taga Dakbayan sa Sugbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph