DUNAY posibilidad nga mahibalik ang Sugboanong pointguard sa PBA nga si Mac Tallo kinsa anaa karon sa Bacolod team sa Maharlika Pilipinas Basketball League (MPBL).
Kini human nga nalakip siya sa mga target sa Phoenix Pulse nga mo-reinforce sa Fuelmasters sa nagpadayon nga PBA Commissioner’s Cup.
Si Phoenix coach Louie Alas mibutyag niadtong Miyerkules human nila mapildi ang NorthPort Batang Pier nga nagkinahanglan sila og pointguard nga makatimang sa iyang mga beteranong sila si RJ Jazul ug Alex Mallari.
“We’re looking for isang point guard... Kung makakakuha kami sa free agency. Hopefully,” matod ni Alas nga nakuhaan og pamahayag sa Foxsports.com.
Ang desisyon ni Alas mitumaw human masayri nga ang ilang lehitimong pointguard nga si LA Revilla dili na makaduwa sa tibuok conference tungod sa angol niini sa tiil.
Sa dihang gipangutana kon anaa na ba siyay nahunahunaan nga ipuli ni Revilla, ang seasoned coach mitug-an nga anaa na ug kini nagduwa sa MPBL.
Gawas kang Tallo, ang mga kanhi guard sa PBA nga anaa karon magduwaan sa MPBL mao sila si Mark Cruz, Pamboy Raymundo ug Jeff Viernes.
Sa upat, si Tallo maoy pinakauwahing na-release gikan sa PBA.
Ang amahan ni Mac nga si Mark mipasabot nga nakapirma na og kontrata nga hangtod pa sa Disyembre ang iyang anak.
Hinuon matod niya nga magdepende kini sa tanyag sa PBA team nga gustong mokuha niini.
“Depende na kon i-buyout ang iyang kontrata, unya mosugot sab ang Bacolod. Natingala bitaw ko kon nganong dali-dali siya og perma sa MPBL nga tulo ka teams sa PBA ang gusto man unta niya,” matod ni Mark kinsa mibutyag nga gusto unta usab sa Cebu Sharks mokuha sa serbisyo sa iyang anak. (JBM)