HUMAN sa ilang masakit nga kapildihan, daw sa mangtas nga mibalik sa korte ang University of Cebu (UC) Webmasters nga midabo-dabo sa HMMED Enterprises/Cagayan de Oro City, 86-70, sa elimination round sa Mayor’s Cup Invitational Basketball tournament sa Lope Asis Memorial Gymnasium sa Bayugan City, Agusan del Sur kagahapon.
Ang gipaluyohan sa Mair Construction nga Webmasters mirehistro sa ilang unang daog human kini patapsingi sa ARQ Builders/Far Eastern University (FEU), 77-82, niadtong Miyerkules.
Si Tosh Sesay mipuga og 25 puntos aron pangulohan ang UC nga mipasaka sa ilang record 1-1 ning upat ka adlaw nga torneyo nga gisalmutan sa mga teams gikan sa Cebu, Manila ug Cagayan de Oro.
Sayo nga miarangkada ang Webmasters nga gani nakaposte gilayon kini og 29-18 nga labaw sa first quarter human mipabuto og tulo ka tres si Tristan Albina kinsa mitapos sa duwa nga may 14 puntos.
Ikasangka sa UC ang Madyaw Construction/Valenzuela Classic karong alas 10 sa buntag sa dili pa kini mosakbang sa Vincare Pharma/Southwestern University-Phinma Cobras sa alas 7 sa gabii.
Sama sa UC, ang SWU naghupot na usab og 1-1 nga baraha. Human sa ilang kadaugan sa Cagayan de Oro City, 71-66, gipukan usab sila dayon sa FEU Tamaraw, 72-87.
Hangtod ning pagsuwat, padayon pang nagduwa ang Cobras ug Valenzuela.
Ang nag-unang duha ka teams sa elimination round maoy magsangka sa knockout match alang sa kampiyonato samtang mag-ilog alang sa third place ang no. 3 ug no. 4 teams.
Ganting cash nga P200,000 ang mabulsa sa kampiyon samtang P150,000 ang runners-up. Mouli nga may dalang P100,000, P75,000 ug P50,000 ang pasunod nga makaangkon sa ikatulo, ikaupat ug ikalima nga dapit. (JBM, RSC)