DILI si Troadio motuo sa gisulti sa ilang ‘professor’ sa Economics 200 sa iyang pag-ingon nga “Dream big for your future, don’t think of small things.” Bisan giunsa-unsa niyag timbang-timbang makaayo sad ang mga butang gagmay.
“Kay way dako baya nga makapuling,” matod sa iyang Lolo Pekto. “Gamay ra tuod ang sugsog, apan kon di tagdon mohubag imong kamot kay ma-infected, kuyaw nga matitanus ka,” matod pud sa ilang ‘family doctor.’
Nahinumdom siya sa ilang kalubihan nga dunay mga polipog nga gibuhi sa iyang Papa Dencio nga ganahan niyang sak-on kay namungingi sa mga butong. Adto siya sa itaas magtungkawo nga magkaon sa butong. Hayahay pa sa pulis kay mabusog siya.
Gamay ra tuod ang buok sa bunga, apan dasok sa unod. Poli-polipog lang, apan makabusog. Kay daghan ang mga bunga sa polipog apilon sad sa iyang amahan pag-kupras, ikapuno sa ‘income’ sa ilang dakong kalubihan.
Kana diayng panultihon nga ‘small but terrible.’ Ang ilang klasmeyt lang nga si Rene Bagwis nga gamayg lawas ug mubo pa, brayt kaayo sa klase. Bisan unsaon niyag gukod di maapsan ang grado. Hinungdan nga gikuninitan sa mga babaye. Layo ra silang mga dagko ug guwapo.
Wa kapugngi ang panahon nakatapos siya sa iyang kurso nga ‘Business Management.’ Giduol siya ni Mr. Pol Tagsip, ang ilang ‘professor’ sa Economics 200.
“Mag-unsa ka, Traddy, ugma damlag?” matod ni Mr. Pol Tagsip.
Naghunahuna siya unsay itubag. Taudtaod namulong siya, “Kuan, Sir, mag-negusyo lag ginagmay.”
Miduol si Pater, ang hanginon nilang klasmeyt. “Ako, Sir, magtukod og korporasyon aron madato. Di ba. ingon ka, dream big?”
Miyango-yango ang propesor nga nagpahiyom kang Paterno samtang salabtunon nga mitan-aw kang Troadio.
Sa iyang pagtuo wa malimot si Mr. Tagsip sa iyang gipabuhagay nga pagsupak niini sa pag-ingon, nga bisan ginagmay basta kanunay, igo lang gihapon ang kaugmaon. “Supak ko, Sir, sa dream big ug don’t think of small things!”
Wa kapugngi ang panahon milambo ang buy & sell nga negusyo ni Troadio nagkadaghan ang iyang mga ‘branch’ hangtod nakapatukod siyag usa ka dakong Mall sa siyudad. Usa lang ang gisandigan niyang batakan sa iyang negusyo, “Bisag ganansiya gamay, basta kanunay.”
Nahibalik siya sa ilang dapit sa dakong tuyo nga ihatag niya ang iyang bahin sa kalubihan sa iyang manghod nga babaye aron matabangan ang panginabuhi niini. Dugay nang ninghalin sa laing kalibutan ang ilang ginikanan.
Atubangan sa punoan sa lubing polipog nga buhi lang gihapon nga iyang giduaw, nahinumdom siya sa iyang Economics 200 Class. Kumosta na kaha si Professor Tagsip ug ang paborito niining tinun-an nga si Paterno de Roso. Daghan man sad siyang nakat-unan gikan sa iyang magtutudlo mahitungod sa ekonomiya nga nakatabang niya.. (KATAPUSAN)