DI GYUD ko kasabot aning tighatag sa dungog nga National Artist kon nganong karong namatay na hinoon si Eddie Garcia, mao pay pagkahunahuna nga ilhon kining National Artist.
Diin man intawn mo adtong nagginhawa pa ang beteranong aktor? Pahuway kaha mo!
•••
Ikatulo na tingali ka higayon o labaw pa nga nakita ug nadungog nako si Ms. Universe Philippines 2019 Gazini Ganados nga giinterbyu ug nakaingon ko nga nasayop ang iyang mga bashers nga di siya makamao motubag labina sa Question & Answer portion sa Bb. Pilipinas pageant.
Tinuod, di siya parehas kapaspas mosultig Inengles parehas ni Ms. Universe 2018 Catriona Gray nga Inengles ang kinaon kada adlaw pero, in fairness, maayo mopasabot si Gazini kon unsa man ang naa sa iyang hunahuna agig tubag sa pangutana.
Mao nga may purohan nga makadani, makapatutok ug makapalingi si Gazini sa mga hurado ug mga manan-aw sa Ms. Universe 2019 sa hinapos karong tuiga.
•••
Ang Ginoong Pilipinas Cebu 2019 mopahigayon sa press presentation sa 20 ka mga kandidato diin usa morepresentar sa Cebu sa national pageant unya sa Oktobre.
Adto pagahimoon sa The Pyramid sa IT Park sa Lahug, Cebu City ugma, Hun. 29, sa alas 4 s.h.
•••
Taudtaud na gyud tingali kong wala makatan-aw sa mga dula sa Phil. Basketball Association sukad adtong nakampyon ang San Miguel Beermen. Nakalitan ko pagtan-aw nga daghan na ang mga players nga nagpinangko (ponytail) na ang buhok.
Pipila sa akong nasigpatan nga tag-as og buhok mao sila si Lassiter, Cabagnot, Aguilar, Romeo, Mallari, Standhardinger, Fajardo, Ross, Rouser, Melton, Vigil, Pingris ug daghan pa.
May angayan, duna say... hmmm... dili! Ang pinakakontra nako tan-awon mao ang buhok ni Japeth Aguilar. Morag maka-imadyin kon nga may kuto. Haha! Dyok!
Nakapangutana ko: unsa na diay ning PBA? Pataasay’g Buhok Association? Pero bisan pag angayan ang sama nila ni Standhardinger, Pingris, Romeo ug Vigil, mas nindot pa gyud tan-awon ang mubo og buhok sama nila ni Arwind Santos, Gio Jalalon ug uban pa.
Nakamatikod mo nga inanay nang namubo ang purol sa mga magdudula? Mas nindot alang nako nga mubo usab ang ilang buhok. Anà!