HILIG ka bang mo-travel abroad nga adunay adventure feel, apan minos ang gasto?
Ang pagsuroy sa Phuket Thailand maoy tubag sa imong damgo gawas sa kalingawan inyo sab masayran ang kultura, kasaysayan ug tinuohan o relihiyon sa mga Thai.
Kuwangon ang inyong oras sa kadaghang dapit ang mamahimong masuroyan sa Phuket sama sa Patong’, Kata, Karon, Tritrang, Kamala, Surin. Bangtao, Laguna ug uban pa.
Inig tugpa pa lang sa ilang international airport sa Mai Khao sugaton ang mga pasaherong turista og tam-is nga mga pahiyom timaan sa ilang mainitong pagdawat sa inyong pag-abot sa ilang nasud.
Kalingawan sa Pa Tong
Una nakong gitaak ang Patong usa kini ka beach area nahimutang sa southwest sa Thailand diin sa maong area naglumbay nga establisemento niadtong mahiligon og night life.
Unsaon pag-adto sa maong dapit? Aduna kay duha ka kapilian mamahimong mosakay sa bus (150 Thai Baht) o mo-abang og van (600 – 800 baht) nga maoy ideal alang niadtong grupo sama sa family o barkada adventure.
Gibana-bana na usa ka oras ug 30 minutos o ngadto sa duh aka oras ang biyahe gikan sa airport sa dili pa moabot sa maong happy place.
Ang siyudad sa Patong, kon akoy pahukmon kini maoy the best nga dapit nga laagan dinhi sa Phuket, ilabi na isip first time nga outside-the-country-traveller.
Gawas sa nagpangamay nga sandy white beach inyo sab nga masaksihan ang makadani nga sunset ug sunrise.
Sa maong area anaa ra sa duol ang mga sikat nga tourist destinations sama sa mga nagkadaiyang outdoor activity.
Tips
Alang kanako aron nga mas dali ug makadaginot ka mas bintaha kon earlier booking sa mga dapit nga gusto nimong suroyon..
Tourist attractions
Usa sa makalingaw nga attractions mao ang Phuket Dolphin Show nga inyong masaksihan ang lantip nga panghuna-huna ug talented kaayo nga dolphins.
Ang Nemo Dolphins Bay Phuket sa Chang Wat, Phuket sa kantidad nga P869 lang, inclusive na free pick-up gikan ug hatud sa Hotel sa Patong.
Sulit ang kantidad ug dili na kabayran ang kalipay ug pagka-amaze sa dul-an usa ka oras nga Dolphin show.
Diin dinhi nimu makita ang ilang mga talent sa pagsayaw, kanta, bisan na ang pag-drawing, paggamit og Hula hoop, ang mag-acrobat uban sa ilang mga instructor, ug susama’g molukso o molupad og pipila ka metros.
Pipila lang kini sa makalingaw kaayo alang kanimo, bunos pa kay aduna usab duha ka mga cute ug parehong talented usab nga mga seal, nga maoy unang mapasigarbuhon nga magpakita sa ilang mga talent.
Aduna pa gyud kamu kahigayonan nga makadu-ol ug makapahulagway kanila.
Mahimo mo usab makita ang halos kinatibuk-ang kanindot ug historical nga lugar sa Phuket, sa usa lang ka adlaw sa kantidad nga P953.
Matagbaw ka sa pagselfie o groufie ug mabusog ang imong mga mata sa Phuket wonders sama sa ilang mga historical ug religious place.
Sama sa pag-sightseeing diha sa viewpoints sa Kata, Nai Ham Windmill view point ug Promthep cape, diin kini ang pipila ka mga tag-as nga lugar nga makita nimu ang halos kinatibuk-ang Phuket lakip na ang beaches.
Dili mawala ang pakighagwa sa mga baby elephant, baby pa gani apan mas dako pa nako ug super cute.
Makasuway ka sa pagpakaon niini ug sab-a nga saging, mo-kiss ug mo-hug usab kini kanimo.
Dili usab nimo ma-miss ang pagkatkat sa puti o gold Big Buddha gawas nga ikang adunay panahon nga makapaghinulsol, apan susama na usab ikaw naka-exercise sa mga hagdan nga imong sak-on.
Mas mahingangha ka sa mga makuti kaayo nga pagka-design nga Temple sa Chalong, diin dinhi pa lang makita mo na ang kultura sa Thailand.
Of course kay kon moingon ka og Phuket, mga mala-crystal nga kadagatan ug puti nga balas ang mosud gyud dayon sa imung huna-huna, ilabi na kon masuroy nimo ang nagkadaiyang mga isla.
Napilian sab nako ang mag-island hopping ngadto sa three-Khai’s, ang Khai Nai, Khai Nui ug Khai Nok diin libre na nga pagkat-on sa snorkling sa dili pa kabalo.
Ma-amaze ka nga makiglangoy-langoy uban sa mga cute,colourful nga mga isda sa tunga-tunga sa isla sa Khai Nui ug Khai Nok, kini imong matagam-taman sa kantidad nga P1,076.
Ang maong mga activities nga naha-una ko ng nahisgutan mahimo nimu ma-book sa usa ka application nga available ma-download bisan asa ka man, (dili ko nalang higutan unsa nga app kay libre na nga promotion alang kanila, ahaha).
Dugang perks
Apan kon anaa ka lang sa Patong area, dili mo na kinahanglan molabang pa og mga isla, kay diha pa lang sa ilang public Patong beach, susama anaa kana sa giingon nila nga Paraiso sa kalimpyo usab sa ilang baybayon.
Fresh nga hangin, nga dili sakit sa panit nga kainit sa panahon ug makita mo usab ang mga adventurist nga mga turista nga mag-parasailing.
Diha sa pag-shopping, mahimo maduaw ang Jungceylon shopping center nga abli matag 7:00 sa gabii hangtod na sa 9:00 gabii, aduna sab silay water show pagpasabot sa historical nga estorya sa Jungceylon.
Gikan sa Jungceylon, mahimo mo na malabang ang susama og food bazaar diin sa barato lang nga presyo, mabusog kana pag-ayo sa mga lamian nga seafoods ug mabungog ka sa kadaghan sa ilang serving sa kan-on (rice).
Ayaw kalimti ang lami apan bug-at ang busog nga Pad thai noodles ang pinangita ko na karon nga Thai iced tea ug ang ilang sticky rice with mango. (Basta lami ug barato ilang seafoods, ayaw lang sa restaurant nila).
Kon mabusog kana, mahimo mo na malakaw ang taas-taas nga stretch sa ‘Bangla Walk’ atol sa kagabhion, diin susama lang kini sa pinasosyal nga Colon night market sa syudad sa Sugbo, kay imbes nagkadaiyang baligya nga gitinda ang pag-agni sa mga bars, videokehan ug uban pang nightly activities ang idalit kanimo.
Dili mo usab ikabalaka ang imung kapuy-an kay adunay mga hotel o hostel nga barato lang sa hotel pa lang mamahimo ka na maka-book diha sa cellphone app sa kantidad lang og P600, diin limpyo ug hamugaway na usab.
Pagpili lang sa gusto gyud nimu nga lokasyon, apan advice nako nimu, pilia ang mga hotel sa Patong nga duol sa public beach mas buotan ang mga tawo.
Sa tulo ug tunga sa adlaw nga pag-suroy nako sa maong dapit napuno ang memory sa akong cellphone sa mga instagramable photos.
Apan lakip na sa napuno sa maanindot ug unforgettable memories ang akong pangisipan ug kasing-kasing ilabi na kon kauban nimu sa paglaag, for the first time, ang usa sa imung mga real friends. (Hulagway ni Jinky Rosit)