UBAY-UBAY ang mga nireklamo nga gipangsakitan og tiyan ug gipanghilantan human nangaon sa usa ka kan-anan nga “eat all you can” nga nahimutang sa Del Pilar Street, Siyudad sa Cagayan de Oro.
Nagpatala sa kapulisan sila si Jealany Taborada, 38, minyo ug Julius Jemerino, 47, minyo, taga Barangay Nazareth.
Sa nahipos nga impormasiyon gikan sa Police Station 1 (PS1) sa Divisoria, gikabutyag nga niadtong Hunyo 23 nidangop sa buhatan sa kapulisan si Jemerino ug gireklamo ang maong kan-anan human giingong na food poison ang tibuok pamilya niini ang asawa nga si Gerimille, 45 lakip na ang 14 anyos nga anak ug daling nagpaalim sa usa ka pribadong balay tambalanan.
Giingong lakip sa gipangkaon mao ang seafood, chicken, fruit dessert sama sa pinya ug pakwan.
Samtang nidangop usab sa buhatan sa kapulisan pasado alas 7 sa gabii sila si Taborada human nakasinati og susama nga gibati nga gisakitan og tiyan ug nagsuka lakip ang bana nga si Gilbert.
Nasayran usab nga ubay-ubay ang mga mireklamo diha sa social media human usab nakasinati og susamang mga pagpanakit sa tiyan ug uban pa.
Samtang nitubag usab pinaagi sa Facebook page sa maong kan-anan nga ila na kining pa-imbestigahan ug gani nangayo og pasensiya sa nahitabo.
Sa pakighinabi sa SunStar Superbalita kang Dra. Fe Bongcas sa City Health Office (CHO) gibutyag niini nga gisusi na kini niadtong Hunyo 25, adlaw nga Martes ug wala pay pinal nga resulta gani gitambagan na nga magpadala og letter of complaint sa ilang buhatan ang mga biktima.
“Ako naman to giingnan nga magpadala og letter of complaint, ato na gi-inspect niadtong tuesday, wala pa’y final,” matud ni Bongcas.