POSITIBONG gilumsan ang dos anyos nga bata nga nakit-an sa tub sa kusina sa usa ka boarding house sa San Vicente Baybay, lungsod sa Casinglot, lungsod sa Tagoloan, Misamis Oriental.
Kini ang gibutyag ni Police Major Allan Oniana, hepe sa Tagoloan Police Station atol sa interbyu sa SunStar Superbalita.
“Migawas ang resulta sa otopsiya ug dili drowning iyang namatyan, suffocation kay gitabunan iyang baba,” matud ni Oniana.
Gibulgar sab niini nga dako iyang pagtuo nga anaa sa sakop lang sa pamilya ang nihimo tungod kay basi sa ilang imbestigasyon nasuta nga kini nga bata giingong usa sa hinungdan sa lalis sa mga ginikanan niini.
Adunay lawom nga rason apan dili lang buot iyagyag ni Oniana sa prensa aron dili mabalda ang padayon nga imbestigasyon.
Dugang niini nga nangita pa sila og mga saksi aron mas mapakusog ang kaso ug madakpan ang suspek.
Kahinumduman nga nadiskubre kining 2 anyos nga bata sa usa ka boarder nga si Jessa Jarabe dihang maghugas unta kini og plato ug dihang pag-abli sa tub pagkalos og tubig tiil sa bata iyang nakita hinungdan sa pagsinggit niini ug pagpakitabang sa iyang mga kauban sulod sa boarding house.
Dali sab dayon kini nilang gikuha ang 2 anyos nga si Renz Gubat ug gidala sa St. Paul Hospital sa maong lungsod apan dead on arrival kining gideklarar sa mga doktor.