IHATAG na usab sa Regional Advisory Council sa Police Regional Office (PRO) 7 ang P100,000 nga ganti alang sa mga nakatabang sa pagsulbad sa kaso sa dalagang si Christine Lee Silawan.
Kini ang gibutyag ni Police Brigadier General Debold Sinas, director sa PRO-7.
Matod ni Sinas iya nalang gihuwat ang memo gikan sa hepe sa Lapu-Lapu City Police Office, Police Colonel Limuel Obon, nga iyang ihatag sa RAC aron ma finalize na ang pag release sa ganti.
Gibutyag ni Sinas nga ang nagbahin sa P1 million nga ganti gikan sa kagamhanan sa Dakbayan sa Lapu-Lapu mao ra usab ang magbahin sa ganti sa RAC sanglit sila kini ang nakatabang sa pagsulbad sa kaso.
Way pormal o ceremonial nga turnover sa kwarta ngadto sa mga impormante sanglit di buot ang kapulisan nga mabalda ang ilang pribadong kinabuhi.
Gipadayag usab ni Sinas nga anaa ra sa ubang mga tawo nga nisaad nga mohatag og ganti alang sa kasulbaran sa kaso sa pagtuman sa ilang saad sanglit di sila makapugos kanila.
Sa pagkakaron, wa pay laing nakig-alayon kaniya o sa LCPO kalabot sa mga saad kon madayon pa ba o dili.
Ang importante, matod sa director, natuman ang saad sa ilang advisory council nga mohatag sa ilang ganti.
“Basta ang amoa after the local government unit (LGU Lapu-Lapu) nga gituman ilang gi-pledge ang among advisory council nituman pud sila para walay estorya nga pulos estorya lang,” matod ni Sinas. (GCM)