DILI motambong si outgoing governor ug Vice Governor-elect Hilario Davide III sa seremonyas sa inagurasyon ni Governor-elect Gwendolyn Garcia sa Dominggo sa hapon, Hunyo 30 sa Social Hall sa Kapitolyo.
Sumala ni outgoing Provincial Information Officer Ainjeliz De La Torre Orong dunay lakaw si Davide kuyog sa iyang pamilya human sa oathtaking pagkabuntag sa samang adlaw.
Si Davide ang manumpa atubangan ni outgoing Bise Gob. Agnes Magpale, alas 10:30 sa buntag sa maong adlaw sa Casino Español de Cebu, dakbayan sa Sugbo.
Iyang gipili si Magpale sanglit kini maoy iyang running mate sa miaging eleksyon niadtong Mayo 13, 2019.
Si Davide ang apil sa giimbitar ni Garcia nga patambungon sa iyang inagurasyon uban sa mga senador, kongresista, mayor ug bise mayor sa lalawigan sa Sugbo.
Anaa usab ang miyembro sa banay nga Garcia ug Fiel.
Imbitado usab ang mga miyembro sa diplomatic ug consular corps, mga pangu sa lainlaing mga buhatan sa gobiyerno sa nasudnong kagamhanan, mga sakop sa hudikatura ug mga higala ug tigpaluyo ni Garcia.
Si manlalaban Frank Eduard Dinsay V, miyembro sa transition team ni Garcia, wa motug-an kon kinsa ang mopapanumpa ni Garcia karong hapon sa Biyernes, Hunyo 28 ug kon kinsa usab ang gipaabot nga mga bisita niini gikan sa kaulohan sa Hunyo 30.
Matod niya, mahibaw-an kini human sa turnover ceremony tali ni Davide ug Garcia karong adlawa, Hunyo 28, sa alas 9 sa buntag sa social hall sa Kapitolyo. (SCG)