GUMIKAN sa pagtuo nga siya maoy “unifying force”, gituboy sa kadaghanan sa 44 ka mga mayor sa lalawigan sa Sugbo si reelected Liloan Mayor Christina Frasco isip mosunod nga presidente sa League of Municipalities of the Philippines (LMP) Cebu Chapter.
Bisan ang mga mayor nga dili mga miyembro sa One Cebu party nga gipangulohan sa inahan ni Frasco nga si Governor-elect Gwendolyn Garcia, ang nipadayag usab sa ilang tibuok nga suporta sa mayor sa Liloan ug umaabot nga administrasyon ni Garcia.
Sa iyang pakigpulong atol sa tigom sa LMP sa Golden Prince Hotel and Suites niadtong Miyerkules sa gabii, Hunyo 26, si outgoing LMP Cebu Chapter President Democrito Diamante, outgoing mayor ug Vice Mayor-elect sa lungsod sa Tuburan, nituboy ni Frasco atubangan sa 32 ka mga mayor nga nanambong.
Iyang gihulagway si Frasco nga unifying force nga maoy makahiusa sa mga mayor ngadto sa iyang inahan nga si Garcia labi na kadtong dili mga kapartido sa One Cebu party.
“Siya maoy unified factor kay anak siya ni Gov Gwen. Active pud kaayo siya ni-support sa atong administration as LMP president,” pamulong ni Diamante, kinsa naa sa ikatulo ug katapusang termino pagka presidente sa liga.
Matod niya, supportive si Frasco sa mga kalihokan ug programa sa liga sukad nga nakadaog kini pagka mayor sa Liloan niadtong 2016.
Si Diamante nidugang nga halos matag tigom sa LMP, motambong si Frasco, hinungdan nga alang niya kini ang angayan mahimong mosunod nga presidente sa liga, gawas sa pagka anak niini ni Garcia.
“Kanang iyahang pag-attend sa mga meeting nga ipatawag sa LMP, usa na siya ka indikasyon nga she will be a good leader to the league,” dugang ni Diamante.
Si Frasco sa iyang bahin, hugot ang pagpasalamat ug pagpaubos sa iyang kaubang mga mayor sa ilang endorsement isip mosunod nga presidente sa LMP Cebu Chapter.
“Kon mahatagan og higayon, kaloy-an sa Ginuo, pamaagi ra gyud na sa inyong tabang ug suporta. We can further make the LMP a potent force for unification of all mayors in the entire Province of Cebu. Magkahiusa tang tanan alang sa kalambuan sa tagsa-tagsa nato ka munisipalidad ug sa tibuok probinsya sa Sugbo,” pamulong ni Frasco, kapikas ni Congressman-elect Vincent Franco “Duke” Frasco, sa iyang text message sa Superbalita Cebu.
Sa unang termino ni Frasco isip mayor sa Liloan, gipasidunggan ang lungsod isip labing maayo nga local government unit sa good governance sa lalawigan, numero uno nga munisipalidad ug most child-friendly LGU sa Sugbo ug uban pa.
Si Diamante nibutyag nga bisan ang mga mayor sa Bakud party ug sa ikaduhang distrito sa lalawigan moporta kang Mayor Frasco. (SCG)