PAG-salvage sa nalunod nga cargo vessel ug pagseguro nga dili mokatag ang oil spill sa dapit mao ang prayoridad sa awtoridad ug kadagkoan sa Solid Earth Development Corporation (SEDC) sa pagtikyaob sa MV Eva Mary Grace niadtong Martes sa hapon, Hunyo 25.
Samtang gisuspenso na sa Maritime Industry Authority (MARINA) ang cargo ship safety certificate sa maong barko subay na usab sa probisyon sa Republic Act 9295 o ang Domestic Shipping Development Act of 2004.
Gisuspenso na usab ang seafarer’s identification ug record books ni Captain Michael Zeta ug Chief Officer Orlando Ancajas.
Sa pagkakaron gihimo na sa Coast Guard Central Visayas ang Marine Casualty Investigation diin gilangkuban kini sa team gikan sa station commander sa Coast Guard Ceby, Commander Maritime Safety Service Unit Commander, Marine Environmental Protection Unit Commander, ug sa Coast Guard Legal Unit.
Gi-convene na usab sa MARINA 7 ang ilang Maritime Crisis Management Committee isip parte sa ilang imbestigasyon sa insidente.
Nasayran niadtong Miyerkules sa buntag, Hunyo 26, nakamatikod ang Coast Guard Marine Environmental Protection Unit og inagian sa lana nga posibleng gikan sa maong barko.
Sa gihimo usab nga inspeksyon sa divers sa Coast Guard sa maong barko, wala’y nakita nga kadaot niini ug ilahang gisuwayan ang pag-seal sa port fuel vent apan dili kini nila makita.
Sa Huwebes, Hunyo 27, himuon ang pagkuha sa diesel sa maong barko.
Nasayran nga iya ni David Villono sa EVA Shipping Corporation ang maong barko nga natikyaob.
Matod sa tigpamaba sa Coast Guard Central Visayas Lieutenant Junior Grade Michael Encina nga dili pa sila makasuta sa timeline sa pag-salvage.
Gibutyag usab ni Encina atol sa iyang pakighinabi sa supervisors sa pantalan sa SEDC dihang nibisita siya sa dapit nga wala ra makabalda sa operasyon ang insidente.
Puros mga cargo vessel usab ang nakadunggo sa maong pantalan ug mga semento ang kasagaran nga kargamento ang ibiyahe gikan sa maong pantalan.
Di pa usab matubag sa Coast Guard ang danyos sa kadaot apan, gibutyag ni Encina nga ang kantidad sa cargo vessel, mao usab ang kantidad sa kadaot sa maong pagtikyaob.
Ang wala pagbalanse sa maong barko dihang nagkarga og semento mao ang rason nga natikyaob kini niadtong Martes, Hunyo 25, sa pantalan sa SEDC sa South Poblacion, lungsod sa San Fernando.
Nasayran nga anaa sa 760 metric tons o 19,000 semento ang kapasidad sa maong barko, dihang nalunod kini anaa na kini sa 720 metric tonelado nga semento. (HBL)