Sabalones naa pa sa freezer sa punerarya, P2 Milyones na bayrunon

KAPIN sa 60 ka adlaw na ang milabay human gipusil-patay ang niangkong drug lord sa Sugbo nga si Franz Sabalones, apan hangtod karon naa pa kini karon sa punerarya sa dakbayan sa Quezon.

Si Police Colonel Erson Digal, ang deputy chief sa Quezon City Police District (QCPD), nagkanayon nga niadtong Hunyo 18 adunay mipatim-aw sa ilang buhatan ug miangkon nga siya ang iyaan ni Franz Sabalones.

Iya untang kuhaon ang lawas sa iyang pag-umangkon apan gimandoan kini nga kuhaan siyag swab sample alang DNA examination apan wala na kini mobalik pa.

Miabot na usab matod pa ngadto sa dul-an na sa P 2 milyones na ang bayronon sa pamilyang Sabalones ngadto sa punrarya nga maoy nag-atiman sa pag-embalsamar hangtod na sa pagbutang niini sa freezer.

“Diri na daw tong nagpaila nga iyaan pagka Hunyo 18 pero wala naman mobalik hangtod karon. Makig-coordinate nalang mi ani sa LGU aron malubong na ni kay sobra 60 days naman ni wala kuhaa,” matod ni Digal.

Una nang mitug-an si Police Brigadier General Debold Sinas, direktor sa Police Regional Office (PRO) 7, dili ma-release ang lawas ni Sabalones kung dili mapaubos sa DNA test ang mo-claim niini.

Ang kapulisan sa probinsya sa Sugbo misuway pag-adto sa mga balay sa pamilya ni Franz sa lungsod sa San Fernando apan giingong wala na kini didto.

Bisan ang kapuyo niini sa lungsod sa Minglanilla nga una nang gironda sa kapulisan wala na usab makit-i.

Awhag ni Digal sa mga kabanay nga kung ila pang kuhaon ug ipahimutang ang lawas ni Franz Sabalones buhaton na nila kini karong semanaha.

Ang kapulisan sa QCPD hangtod karon blangko pa kung kinsa ang nag pusil patay sa Sugboanong durugista. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph