DUL-AN 3,000 ka mga casual, contract of services ug job order (JO) nga mga kawani sa Kapitolyo nameligro nga mawagtangan og trabaho sa higayon moasumir na ang bag-ong administrasyon ni Governor-elect Gwendolyn Garcia.
Ang kampo ni Garcia ang nitambag sa mga casual ug JO nga mga kawani nga dili na motunga sa trabaho sugod karong Hulyo 1 gawas kon gilugwayan sa bag-ong gobernador ang ilang mga kontrata.
Si manlalaban Frank Eduard Dinsay V, miyembro sa transition team ni Garcia, nibutyag nga atol sa turnover karong Biyernes, Hunyo 28, mohatag sila og listahan sa mga department head sa Kapitolyo, apil sa transition team ni outgoing governor ug Vice Governor-elect Hilario Davide III, kon kinsa sa mga JO ug casual ang malugwayan ang mga serbisyo sa bag-ong gobernador.
“Governor Gwen is not officially the governor yet so that’s why we cannot issue any memorandum circular or any official document. So what we do, so that to also help those whose persons under the JO that we will inform the department head and sila na lay mo-disseminate sa information which will be formalized by Governor Gwen once she assumes sa office,” pamulong ni Dinsay ngadto sa mga tigbalita.
Si outgoing Provincial Information Officer Ainjeliz De La Torre namahayag nga nanghinaut sila nga makuha dayon ang listahan karong Biyernes human sa turnover tali ni Garcia ug Davide.
“Para dili gyud siya mabakante ba. Ingon man nga tomorrow na makuha dayon. Right immediately after getting the list from the transition team i-release dayon nato ni, pahibaw-on dayon ang atong mga jo and casual nga ma-renew para dili mablanko,” dugang ni De La Torre sa buwag nga pakighinabi sa mga tigbalita.
Si Garcia unang nimando sa iyang transition team sa pag-review sa performance sa tanan mga empleyado ug department heads sa kagamhanan sa lalawigan sa Sugbo sa nangaging unom ka tuig.
Sa iyang proclamation speech niadtong Mayo 16, si Garcia namahayag nga wala siya makalimot sa mga nagtraydor ug nagpabilin nga loyal niya taliwa sa nahitabo niya human siya nasuspenso niadtong 2012 ug nahuman ang termino pagka gobernador sa Hunyo 2013.
Si Dinsay nidugang nga kadtong naa sa listahan isyuhan og temporaryo nga mga ID ug gitambagan nga magdala og 1X1 picture aron maisyuhan og bag-ong ID. Sumala niini nga i-formalize ni Garcia ang pahibalo pinaagi sa pag-isyu og memorandum circular karong Hunyo 30.
Sa record sa Human Resource Management Office (HRMO) sa Kapitolyo hangtod sa Mayo 2019, adunay kapin sa 4,000 ka mga empleyado sa Kapitolyo: 2,296 ang j.o. ug COS; 1,090 ang mga permanent; 626 ang mga casual ug 18 ang mga coterminous.
Sobra sa katunga sa kapin 4,000 o 2,922 ka mga casual, j.o. ug COS nga mga kawani ang nameligro nga dili na ma-renew ang mga kontrata.
Labing daghan niini kay naa sa mga provincial ug district hospitals nga moabot og kapin sa 1,600 ka mga empleyado.
Sa ihap, labing daghan sa Cebu Provincial Hospital sa siyudad sa Carcar nga moabot og 281 ka mga kawani. Nagsunod ang CPH Danao (221), CPH Balamban (189) ug CPH Bogo (177).
Ang mga provincial hospital dunay kapasidad nga makapahigayon og operasyon sa mga pasyente sama sa total knee replacement ug cataract removal ingon man dialysis.
Sa nangaging pakighinabi kang Lilia Villasin, officer-in-charge sa HRMO, kadaghanan sa mga JO nga empleyado kay nurses ug utility workers, kansang mga kontrata kay i-renew matag unom ka buwan uban sa mga casual.