PAGTAOD og mga security camera ang tinguha nga mahimo sulod ning tuiga sa mga strategic areas sa lungsod sa Oslob.
Kini ang usa sa prayoridad sa nasublian nga mayor nga si Jose Tumulak alang sa dugang seguridad sa lungsod, ilabi na nga ang Oslob ang usa sa mga lugar sa probinsya sa Sugbo nga dagsaunon sa mga lokal ug langyaw nga turista.
Mobalor sa dul-an P1 milyon ang gitinguha nga mapalit nga mga closed-circuit television (CCTV) camera alang sa mga lugar sugod sa Barangay Tan-awan diin nahimutang ang briefing area ug ang kadagatan diin makita ang mga naila nga butanding.
Gitunga sa duha ka phase ang maong proyekto.
Una mao ang pagbutang sa mga CCTV gikan sa habagatang bahin sa lungsod, gikan sa Tan-awan hangtod sa Barangay Pobalcion; Sa Poblacion nahimutang ang merkado ug ang munisipyo lakip na ang heritage park sa lungsod.
Nag-una nga pahimutangan sa CCTV ang mga entry ug exit point diha sa mga pantalan.
Iapil sa sunod budget ang CCTV sa amihanan alang sa sunod tuig.
Ang mga CCTV usa ka pagtabang sa kapulisan ug kasundalohan sa pagpatuman sa seguridad, kahapsay ug kalinaw.
Tinguha usab ang pagpahimutang sa mga security equipment diha sa mga pantalan sa Oslob, sama sa Barangay Mainit, diin aduna'y mga barko nga gikan ug padulong sa Dipolog, Zamboanga del Norte.
Kini aron magduha-duha gyud sa pagaplusot sa mga kontrabado o ang mga tawo nga aduna'y dautan nga tinguha.
Aron ma-monitor, usa ka command center uban sa Municipal Disaster Risk Reduction and Management building ang tukuron.
Kon hingpit na nga mapahimutang ang mga CCTV camera, morekomendar si Tumulak sa ilang konseho alang sa pagpasar og ordinansa nga manginahanglan sa mga establisemento nga magpataod og CCTV camera, ilabi na ang mga hotel, resort, inn ug uban pa nga dagkong establisemento.
Matud ni Tumulak, kasagaran sa mga hotel sa Oslob ang aduna'y CCTV. Alang kaniya, mas maayo nga mahimo kini nga ordinansa.
Lakip sa iyang giawhag nga ang matag establisemento aduna'y security and safety officer nga mao'y makig-alayon sa kapulisan.
"Ato ni gisiguro ang security diha sa briefing area sa Tan-awan diha sa mga kalsada, sa mga dungguanan, sa pantalan. Gisiguro gyud ni nga masugdan karong tuiga kay thousands ni ang tourist ang anaa sa atong lugar, apil na ang atong mga residente sa Oslob," saysay ni Tumulak sa Superbalita Cebu. (Superbalita Cebu)