KAPILDIHAN maisip nga trahedya sa liderato ug ang kadaugan maoy usa ka hagit. Daghan ang nagdahom nga modaog si Mayor Tomas Osmeña. Maoy milusot si Edgar Labella nga magsagubang og hagit sa problema sa basura, trapik ug squatters sa siyudad.
Rep. Eddie Gullas nga nanggungis sa politika misaad nga pikason og kaduha ang unang distrito. Samtang sagubangon ni Mayor Samsam Gullas ang hagit pagsulbad sa baha, basura, trapik ug ilegal nga drugas.
Katalagman ang kapildihan ni Sonny Osmeña. Hayag ang kadaugan ni Rep. Pablo John Garcia nga unang nakapalambo sa ikatulong distrito. Maninguha nga mahimong siyudad ang Balamban nga naila nga ship building industry ingon man ang pagtukod og state college sa Toledo ug Balamban. Ig-agaw ni Sonny nga si Serge Osmeña napilde usab pagka-senador kay motunga lang og eleksyon. Wala madala sa i-serge mo.
Napukan si Rep. Red Durano sa ikalimang distrito kansang pamilya nagdominar sulod sa 70 ka tuig. Nagmadaogon si Duke Frasco nga misaad nga himuong siyudad ang Liloan, scholarship programs ug satellite offices alang sa libreng tambal.
Kinsay nagtuo nga maparot si Boy Radaza pagka- mayor sa Lapu-lapu nga ang pamilya midominar og 18 ka tuig. Maoy palaran si Kapitan Ahong Chan kinsang hagit mao ang pagpalambo sa district hospital, relocation sa merkado, pagsulbad sa trapiko, krimen, squatters ug korente.
Sa kasaysayan unang gobernador nga nakabalik sa Kapitolyo si Gwen Garcia. Mipasalig nga hiusahon ang mga mayor, palamboon ang tinubdan sa tubig, padayong pakigbatok sa drugas, ilegal nga sugal, rebelde ingon man sa pagpanalipod sa kalikopan, school supplies ug abag sa lain-laing sektor. Debt-free ug prayoridad nga mga proyekto aron mahibalik nga number one premiere province. Tagdon ang kabtangan nga napasagdan. Ipa-review ang performance sa 4,021 ka mga regular, casual, job order, contract of service ug nag-abiso sa midnight appointments ug transactions. Gisugdan nag hashas. Namutos na ang uban. Mao ni giingon nga wider-wider lang.
Mikunop na ang liderato ni Erap Estrada nga napilde pagka-mayor sa Manila ni Isko Moreno. Gihikawan sa maayong kapalaran ang mag-half brother Jinggoy Estrada ug JV Ejercito. Lampornas ang Ocho Derecho.
Kanhi Vice Pres. Jejomar Binay napilde pagka kongresista sa Makati ni Even Peña. Sama sa adlaw misalop si Binay.
Nasayod ba kamo nga duha ka Duterte ang napiling mayor sa siyudad sa Sugbo. Sila si Ramon Duterte sa 1957-1959 ug Ronald Duterte sa 1980-1983. Amahan ni Pres. Rodrigo Duterte nga si Vicente Duterte napiling gobernador sa Davao. (csa_1156@yahoo.com / 09064648954)