GIKAN sa kusog nga hagok nga mo labaw pa sa tingog sa dogdog ngadto na sa binirahay-ilog sa habol ma tungang gabii, ang maka-ingong sa kakuwang sa katulog nga kasagaran moresulta sa pag-mika, pagka-wa sa konsentrasyon, paglabad sa ulo, ug pagka- iritabli.
Apan kining tanan di nimo igbali kon katupad nimo imong minahal sa pagkatulog kay kini mas maka-ayo ug makatabang man sa imong tibuok nga panlawas basta seguraduhon lang nga insakto ang walo ka oras nga pahuway.
Bisag maghagok pa o magyawyaw samtang damanon o lihokan sa higdaanan, nindot baya ang bation nga duna kay minahal nga katupad inig piyong sa imong mata ma gabii ug buka sayo sa buntag.
Gani sa gihimong pagtuon sa University of Hertfordshire, 94% sa mga magti-ayon o manag-uyab nga magdulog inig katulog apil ang pag-pillow talk (mag-estorya samtang naa pa sa katre) ug pag-gakos o loving-loving sa mabugnaw nga kagabhion makapa-suod sa relasyon kon itandi niadtong 64% ka manag pares nga di magdulog ug mag-iyahay ra og katulog.
Ang maong pagtuon nag-ingon sab nga kadtong dunay loving nga mga pares di kaayo damanon ug mas makatulog og maayo. Di sab sila tantong makasinati og depression ug di magsegi og kaguol nga maoy hinungdan sa pagmata-mata tungang gabii.
Diay akong dugang nga ikatampo aron sayon makatulog:
Mas hinanok ta nga makatulog kung limpyo og humot ang unlan, habol ug higdaanan (way bunhok o dugho), dili hadlok ug kuyaw ang palibot, way bug-at nga gihuna-huna dinuyugan sa bugnaw nga huyuhoy sa preskong hangin ug hinay nga sonata sama sa tingog sa bawod daplin sa baybayon o ulan nga makatabang sa pagkatulog.
Likaye pag inum og soda, bino ug ubang ilimnong makahubog o kaon og mga junk foods.
Palungon sab ang mga gadgets sama sa cellphones, laptop, o i-Pad aron di ma tintal pag-ukab alang sa mga mensahi o basa sa mga email.
Ang pag-shower o kaligo una matulog makatabang sab labi na og sol-uban og humot nga pajamas o luag nga daster.