KAGAHAPON, gipatuman ang dry run nga nagtugot na sa mga bus ug mini bus nga nagbiyahian sa habagatang bahin sa pag-agi sa bag-ong gi-ablihan nga underpass sa Mambaling, dakbayan sa Sugbo.
Kini gisugdan sa alas 9 sa buntag ngadto na sa alas 3 sa hapon.
Ang maong dry run gihimo ug gitumong aron pagtino kon nakatampo ba og solusyon sa problema sa dagan sa trapiko habig sa gihisgutang dapit.
Kaniadto pang Enero 15 kini giablihan alang sa pribado ug pampublikong sakyanan, lakip na ang mga bus sa KMK Transit nga nagbiyahi-an sa dakbayan sa Naga ug SM City Cebu.
Apan daw og sa naduhigan kini og isyu kay gidid-an sa Cebu City Traffic Operation (CCTO) sa pag-agi ang mga bus ug mini bus sa nahisgutang dapit – butang nga gikasagmuyo ug gireklamo sa mga bus operators. Dili makiangayon alang kanila.
Pero kagahapon, mora og way bili ang maong dry run tungod kay ang oras (alas 9 sa buntag ngadto sa alas 3 sa hapon) nga pasudlon ang mga bus ug mini bus dili man oras sa tingsakay.
Ang kusog sakay sa buntag, alas 6 ngadto sa alas otso ang takna, ug sa hapon, alas singko ngadto na sa alas otso sa gabii.
Nganong dili man himuon nga 24 oras ang dry run aron gyud dinhi nato mahibaw-an kon nakatabang ba gyud ang Mambaling underpass o wa ba mausik ang gigasto niini nga P700 million nga kuwarta sa mga magbubuhis.
Naobserbahan usab nga daghang mga bus ang padayon nga miagi sa South Road Properties (SRP) ilabi na kadtong paingon sa siyudad sa Sugbo, tungod sa nagpadayon nga renovation sa Mananga Bridge sa Tabunok, Talisay City. Daghang bus drivers usab ang wa masayod.
Ambot og unsay leksiyon nga nakuha ug unsa usay sunod lakang nga buhaton sa taga CCTO human sa palpak nga dry run. Kini maoy atong atngan.