HINGPIT na nga gi-ban sa International Olympic Committee (IOC) ang international boxing federation (AIBA) pinaagi sa gipahigayong botasyon atol sa session Biyernes, Hunyo 28.
Ang IOC hiniusang mipabor sa pagpatuman sa rekomendasyon sa executive board nga palagputon ang AIBA ug wala na kini labot sa umaabot nga Tokyo 2020 Olympics.
Usa sa mga gikuhaan og base sa board moa ang kalabot sa pinansiyal sa maong pundok ug ang gubot nga pagpadagan niini. Hangtod nga dili pa kini maresolbar, way kahigayonan nga makabalik kini sa Olympics.
Gikataho nga ang AIBA adunay utang nga mokabat ngadto sa $16 milyones ug daw sa nabahin ngadto sa duha ka grupo ang mga opisyales.
Ang Serbian nga sakop sa IOC nga si Nenad Lalovic, mibutyag atol sa IOC session, nga posibling moabot pa ngadto sa $29 million ang utang sa AIBA.
Ang presidente sa AIBA nga si Gafur Rahimov ang boluntaryong misuspenso sa iyang kaugalingon gikan sa maong puwesto niadtong Marso tungod kay anaa usab siya sa listahan sa US Treasury Department nga nagsuporta ngadto sa mga organisasyon sa mga dautang elemento.
Iya kining hugot nga gipanghimakak.
Ang pagkalakip ni Rahimov sa listahan nakahatag og dakong danyos sa IOC bisan pa man tuod og gihulipan sa interim nga si Mohamed Moustahsane.
“It exposes the IOC and its commercial partners to unacceptable reputational, legal and financial risks,” matod ni Lalovic.
Iyang gisaysay nga ang pundo niini wala makabenepisyo sa sports ug ang kaugmaon sa organisasyon gihudlat usab og problema sa pag-referee.
Ang AIBA nagsalig lang sa ilang kita sa Olympic Games aron kini maka survive ug daghan na usab ang namiya niini human nga gitangtang na sila sa Olympics. Gipaabot nga ang governing body sa maong sports magtagbo aron motuki sa decision sa Executive Committee.
Ang hapon nga sakop sa IOC nga si Morinari Watanabi, presidente sa international gymnastics federation, maoy mangulo sa bag-ong pundo nga gitahasan sa pagdumala og mga qualifying rounds ug inong man sa Tokyo Olympics sunod tuig.