ANG Dabawenya nga si Nova Belle Tega, usa sa upat ka Davao City players nga miapil sa Philippine Lady Volcanoes nga napildi sa China sa finals sa Rugby Asia Women’s Championship Division 1 nga gihimo sa Southern Plains, Canlubang sa Laguna, nagkanayon nga mapasalamaton siya sa iyang kasinatian.
Ang China mipildi sa host squad, 68-0.
Ang 26-anyos nga Tega, sa Facebook interview nagsulti, “Malipayon ko nga nag-second mi sa four countries na niapil. Though sa finals naglisud jud mi sa among kalaban China kay mas athletic ug dagko sila sa amoa pero gipakita gihapon namo ang among makaya.”
Si Tega, nga varsity thrower niadtong kolehiyo, misud sa dragonboating, nagsugod sa pagduwa og rugby football niadtong 2017 apan miapil lamang sa Philippine Lady Volcanoes national team Abril ning tuig.
“It was a great honor to represent our country kay dream jud kaayo nako ni dati pa maskin katong gadula pako ug track and field. Katong pagkahibalo nako na selected ko for the team, super excited kaayo ko sa tanan nga mahitabo sa tournament.”
Dugang niya nga usa ka maayong kasinatian kaniya nga makaduwa kontra international teams diin daghan siya og nakat-unan sa mga coaches ug teammates isip newbie sa tim.
Ang laing tulo ka Dabawenyas nga mipakita sab og aksiyon mao sila Agot Danton, Jane Catherine Francisco ug Diana Cosare.