MAAYONG adlaw! Musta mo mga agaw apil ang mga galawgaw, sipat, buotan ug mga opaw?
Nakasinati na ba mo nga ningtabang apan nabutang hinuon sa kaalautan? Kana god nagpuyo ra ka unya gitawag ka aron patabangon karon ikaw na ang nabutang sa peligro bisan wala man unta kay intensyon o plano nga moapil sa kinabuhi sa ubang tawo. Getch na ninyo?
Akong manghod kahibalo mo first aid “gamay.” Sa dihang naay emergency sa among silingan, gipukaw pa gayud siya sa among balay aron patabangon.
Sa iyang pagtabang (sa silingan ra gani ha), gikawat ang iyang cellphone sa tagbalay ra gihapon. Kaluoy sa Dios, namatay na lang ang pasyente - wala gayud nabalik ang cellphone sa akong paryente.
Ako pod kaniadto, giduolan sa nanginahanglan... ang ending ako nagbayad sa kwartang nahimo nakong utang nga bisan piso wala gayud koy napahimuslan. Makatagam di ba?
Sa pagkatinuod, nagsakit ang akong pamilya (dili mi naga feeling pa-victim ha) tungod susamang sitwasyon ang nasudlan sa among pinalangga.
Nasuko god ko kay sa pagkatinuod nga istorya - wala gayud mi’y labot kung mamatay katong tawhana. Dili namo paryente, suod o higala apan tungod gisangpit among kapamilya - ningtabang sa walay pagduhaduha. Ang ending? Siya karon ang nameligro.
Sakit kaayo sa among dughan mao sa tiilan sa Diyos nga amahan kami nagadagan. Demonyo man ang akong panagway apan sama sa kadaghanan ninyo, nagatuo ug nagaduol pod ko sa Ginoo.
Wala nako nanghasul sa akong mga higala ug paryente kay basin sila magsakit pod ang dughan sa among ginaagian karon.
Sa tinuod lang, lami god ni sila patyon o bisan ilang mga baba kumuton o mata lugiton APAN nasayod ako nga dili kini husto.
Moangkon hinuon ako nga nakasultig dili maayo sa dihang nag-ampo ko sa Ginoo tungod sa kahigwaus nga gibati nako.
Sorry nga ako kining nalakbitan kay puno sa pagkapait karon akong dughan. Tawo lamang nga dili pod kasabot sa dagan sa kalibotan.
Luyo sa among ginaagian padayon kaming nagaampo nga ang kabubut-on ni Hesus ang matuman bisan bisan dili namo masabtan kay nasayod kami nga ang Dios grasyoso ug gamhanan.
Sa pag-ampo unta ako inyo pod pagatabangan. Salamat.