KANHI kapitan sa Barangay Jagoliao, isla sa lungsod sa Getafe, Bohol gipatay sa armadong kalalakin-an pasado alas 4 sa Biyernes sa kaadlawon, Hunyo 28, sulod sa iyang balay uban sa iyang sakop.
Patay diha-diha dayon si kanhi kapitan Alejandro Abaño ug ang iyang tawo nga si Johnrey Bok, nga matod pa, paryente ra usab sa kapitan.
Matod ni Police Captain Benicer Tamboboy, hepe sa Getafe Police Station, nakaangkon og 15 ka mga samad pinusilan ug dinunggaban sa lawas si Abaño hinungdan sa iyang hinanaling kamatayon.
Blangko pa ang kapulisan sa Getafe sa motibo sa pagpatay, apan wa nila wad-a ang posibilidad nga adunay kalambigitan sa pulitika.
Niadtong milabayng barangay election, ang iyang asawa iyang gipadagan nga mao na karon ang barangay kapitan sa ilang lugar.
Way bisan usa ka residente ang nakasaksi sa pagpamusil tungod kay giingong nangatulog pa ang mga tawo sa dihang gisaka sa mga armado ang balay ni Abaño.
Kalit nga nangabot ang mga killer nga naka bonnet ang mga nawong ug dayong saka sa balay sa kanhi kapitan nga natulog sa kwarto. Gipamusil sila sa makadaghang higayon.
Human mapatay si Abaño ug Bok, nanibat ang killers sakay sa pumpboat.
“Nagpadayon pa ang atong imbestigasyon. Dili ta katumbok sa anggulo pero naa na tay gitan-aw sama sa politika. Sa akong nahibaw-an, wala daw ni kontra gawas lang sa bag-o pa nahuman ang election. Wala ta kahibawo nga naay political involvement,” matod ni Tamboboy. Si Police Brigadier General Debold Sinas, direktor sa Police Regional Office 7, nitug-an nga ning tuiga lang nagpatabang kaniya si Abaño tungod sa pasangil nga nalambigit siya sa illegal nga drugas. (AYB)