GIPUSIL patay ang usa ka lalake samtang nagmaniho sa iyang motorsiklo sa wa mailhing nabinugtong tawo kinsa sakay usab sa laing motorsiklo pasado alas 10 sa Biyernes sa buntag sa Cebu South Coastal Road, Brgy. Cansojong, Dakbayan sa Talisay.
Ang biktima nailhan nga si Baby Ulin Labandero, 40, taga Barangay Labangon, Dakbayan sa Sugbo.
Base sa imbestigasyon sa Talisay Police, si Labandero paingon sa habagatang bahin sa Sugbo.
Siya gisundan sa wa mailhing lalake nga nagtaptap sa nawong sakay sa motorsiklo nga kolor itom.
Ang mga saksi nakadungog og tulo ka buto sa armas ug kalit nalang nalamba duol sa usa ka karenderya si Labandero.
Aduna untay mga CCTV camera sa dapit apan matod sa mga nagbantay wa mag-function. Nakuha gikan sa crime scene ang tulo ka mga kabhang sa kalibre 45 nga armas.
Si Labandero adunay tulo ka mga samad sa ulo ug liog nga nakaingon sa hinanaling kamatayon. Wa pa hinuon matino sa kapulisan ang hinungdan sa pagpamusil apan gitan-aw niini nga personal nga panagbangi ang motibo sa kremin. (DRT)