HUMAN sa unom ka tuig ang nakalabay, nag-abot na usab sa susama nga petsa, adlaw ug lugar sila si outgoing Governor Hilario Davide III ug incoming Governor Gwendolyn Garcia alang sa turn over sa renda sa pangagamhanan sa lalawigan sa Sugbo.
Ang kanhi nitugyan sa pangagamhanan nga si Garcia niadtong 2013, mao na usab ang nidawat niini gikan kang Davide sa usa ka seremonyas nga gipangulohan ni Department of Interior and Local Government (DILG) provincial director Jerome Gonzales niadtong Biyernes, Hunyo 28, 2019, sa social hall sa Kapitolyo.
Alas 9 sa buntag, dihang naabot si Garcia sa social hall nga nagsul-ob sa iyang puti nga Filipiniana nga giparesan og pants nga gikuyogan ni Davide nga nagsul-ob og puti nga barong nga giparesan og itom nga pants.
Sa iyang pakigpulong, si Garcia nibalik lantaw sa nahitabo nga turnover niadtong Hunyo 28, 2013 tali ni Davide sa unang termino niini isip gobernador, pipila ka adlaw human niya maserbisyohi ang unom ka buwan nga suspension nga gipahamtang batok niya sa Malacañang gumikan sa grave abuse of authority.
“And now look at us, our roles have been reversed...Truly, life is stranger than fiction. Kon salida pa ni unya motan-aw ta mao ni nahitabo, moingon tingali ta, ah kalisod katuohan,” pamulong ni Garcia sa iyang dul-an 10 minutos nga pakigpulong.
Sa turnover, 27 ka mahinungdanong mga dokumento kalabot sa mga transaksyon, propiyedad, mga report ug uban pa ang gitugyan sa transition team ni Davide ngadto sa transition team ni Garcia nga gisaksihan sa mga department head sa Kapitolyo.
Kini naglakip sa 2018 government assessment report, Commission on Audit (COA) report sa 2018, mga kontrata ug mga kasabotan sa loan, local development investment plan, annual investment plan, annual budget sa 2018, statement of cash flow, statement of receipts and expenditures sa 2018, trust fund utilization ug ubang mahinungdanong mga dokumento.
Si Davide nga unang namulong ni Garcia, nagpasalamat sa mga department head ug empleyado sa ilang suporta, dedikasyon ug kugi.