MAYOR-elect Edgardo Labella mogamit sa opisina nga guba atol sa una niyang adlaw paglingkod isip amahan sa Dakbayan sa Sugbo.
Kini human giguba ang opisina nga biyaan ni outgoing Mayor Tomas Osmeña niadtong Huwebes sa gabii nga nahimutang sa ika-walong andana sa executive building.
Base sa testimoniya sa gwardiya ug kuha sa CCTV camera, moabot sa 20 ka mga tawo nga iya sa usa ka construction company ang ningtangtang sa kisame, nibuak ug nilungag sa tiles,iniduro ug ni-guba sa plumbing ug electrical wiring.
Ang special assitant to the mayor, Raymond Paul Taboada, maoy ni-supervised sa pag-demolish.
Gisugdan ang pagguba alas 8 sa gabii sa Huwebes hangtod sa kaadlawon sa Biyernes.
Si Ronald Malacora, pangulo sa Department of General Services, ni-certify nga ang gipagawas gikan sa 8th floor sa brown cabinet, light and plumbing fixtures, partitions ug pultahan, kisami ug tiles gipanag-iya ni Osmeña.
Si Labella, sa iyang bahin, di makatuo sa gibuhat sa iyang predecessor.
“The ruin of the city mayor’s office is hard to believe. It’s a shocker. But as I reflect on it, perhaps it is no more than a microcosm of the way someone has left an entire city in shambles,” padayag ni Labella.
Si incoming City Administrator Atty. Floro Casas Jr. ug incoming City Legal Officer Atty. Rey Gealon nisusi sa Mayor’s Office ug na-shock sa ilang nakita.
“Nakurat mi kay amo na unta ibalhin ang mga butang ni Mayor-elect Labella gikan sa Vice Mayor’s Office dinhi sa 8th floor isip temporary office kay gipaayo pa man didto sa ubos,” padayag ni Gealon.
Gihulagway niya nga kon ang mga furniture ug ubang butang sulod sa buhatan ni Osmeña gipangkuha kay sila ang tag-iya, wala kini problema.
Iyang gipadayag nga di na makataronganon ang pagtangtang sa kisame, pagbaklas ug paglungag sa mga tiles, pagputol sa electrical wiring, plumbing lakip na sa kusina ug lababo.
Taliwa sa gibuhat ni Osmeña, magpadayon og okupar ang umaabot nga mayor sa kanhi opisina ni Osmeña.
Ang kisame kasamtangan una nga tabunan og trapal aron di mangahulog ang debris samtang wa pa siyay kabalhinan.
Gibalik sa karaan
Gipadayag ni Osmeña nga ang iyang gibuhat mao ang pagbalik kaniadto kon unsa ang 8th floor diin siya nag-opisina.
Iyang giasoy nga niadtong 2001, way partition ug mga opisina ang 8th floor ug pulos ra kongkreto.
Siya na ang nagpatrabaho niini gamit ang donasyon sa mga contractor ug supplier.
Paghulip ni kanhi mayor Michael Rama nga karon umaabot vice mayor, wa kini gamita inay maoy dawatanan sa mga VIP nga bisita.
“What I really did was I spent for it, I took it out. I am restoring what it was all the way back to 2001,” dadayag ni Osmeña.
Giasoy ni Osmeña nga dihang nidaog si Rama niadtong 2010, nigasto ang City Hall og P9 milyones.
Apan dihang siya ang nihulip sa 2016, ang iyang P2 milyones nga gipangayo para sa iyang opisina wa giaprobahan sa City Council. Si Osmeña wa mabalaka sa kaso nga isang-at batok kang Taboada ug ubang mga tawo nga niapil pagpaguba sa iyang opisina.
Gitan-aw sab sa City Legal ang posibleng pag-apil sa ngalan ni Osmeña sa kaso nga ilang isang-at sa korte sanglit naapil pagka-guba ang propiedad sa gobyerno.