NIA karon sa siyudad ang mga environmentalist gikan sa Netherlands alang sa duha ka semana pagtudlo nato sa insaktong paghipos sa atong mga basura ug hugaw aron malikayan ang kadaot sa palibot.

Si Bertus Heugten, coordinator sa PUM kining grupo sa mga eksperto ug mga environmentalist, dunay mga obserbasyon sa paagi pagdumala sa mga basura ug hugaw sa atong dakbayan.

Wa ko makugang sa iyang pamahayag nga dunay mga dapit dinhi sa dakbayan nahimong dako nga basurahan tungod sa kakuwang og pagpakabana ug pagpasagad og labay og basura sa mga molupyo.

Niingon sab si Heugten nga dunay maayong balaod ang Pilipinas gipasar niadtong tuig 2000 kabahin sa recycling sa mga basura apan wala gyud kini hingpit napatuman ug sama sa basura gilabay nalang sab ang maong balaod.

Dili gyud nato malalis kining obserbasyon ni Heugten kay mas tukma kining pagpaniid sa taga-gawas. Mas maayo man gud ning gikan sa laing nasod ang molili sa kahimtang sa atong dakbayan kay makakita gyud sila sa mga depekto sa atong pamaagi.

Ambot kon madutlan pa kaha kita og kaulaw niining obserbasyon ni Heugten. Ma-proud kaha kita isip molupyo sa Cagayan de Oro? Kon i-search nato sa internet ang Cagayan de Oro, mogawas dayon ang mga news - lakip na niini ang obserbasyon ni Heugten.

Dili bag-o kining sugyot ni Heugten nga mohimo og dugang pagtuon ang gobiyerno sa mga pamaagi sa insaktong paghipos ug paglabay sa basura sama sa paggamit og incinerator, o kining paggamit og landfill ug pag-recyle sa mga basura.

Duna nay mga paningkamot o konkreto nga aksyon ang gihimo sa atong gobiyerno bahin niini. Ang problema lang, wala pa gyud nato mabatasan ang insaktong pamaagi kay mopatigbabaw pa gihapon ang atong kahugawan gumikan sa atong pagkatapolan.

Obserbahi lang gyud, dunay mga basurahan gibutang sulod sa PUJ, pero ang mga pasahero molabay pa gihapon og basura sa karsada.

Ang problema nato dili ang kahimanan o lugar nga ikapatuman ang insaktong waste management. Kining pagkahugawan, pagkatapolan - batasan nga problema gyud kaayo sa kadaghanan.

Sunod bitaw atong imbetahon kining eksperto nga motul-id sa hiwi nga kinaiya sa tawo kay daghan uyamot sa palibot nga way maayong pamatasan hinungdan nga hugaw atong palibot.