LAING dako nga paugnat sa kusog ang himuon dinhi sa Davao, ang Penong’s 5150 Triathlon Davao.
Ang paugnat sa kusog gipresenta sa Penong’s Barbecue Seafood & Grill kauban ang Sunrise Events, masaksihan sa mga Dabawenyo, Hunyo 7, 2019 sa Waterfront Hotel.
Gibutyag sa mga nanag-iya sa Penongs nga sila Ma. Teresa Regis ug Vanessa Mae Uy Santos, nga pulos sab triathletes, nga buot nilang madasig ang publiko sa kaimportansiya sa kahimsog sa panglawas, uban sab sa pagpalig-on sa ilang negusyo.
“This is an opportunity to show everyone, especially my children, that this event is not just focusing on selling barbecues but also promoting a healthy lifestyle. This is doing something for the good of everybody,” suma ni Regis.
Ang Penong’s 5150 Triathlon Davao maglangkub sa 1.5km nga langoy, 40km bike ug 10 km nga dagan.
Samtang ang Sunrise Sprint langkuban sa 750m langoy, 20km bike ug 5km run.
Gibutyag ni Sunrise Events Founder Wilfred Steven Uytengsu nga ang 5150 maoy Olympic distance brand sa World Triathlon Corporation.
Tumong sa mas mubo nga distansiya aron mas daghan ang madasig nga moapil.
Ruta
Ang 1.5-kilometer nga langoy magsugod sa baybayon sa Waterfront Insular Hotel.
Partisipante molangoy sa “L” nga porma sa course diha sa Pakiputan strait.
Samtang ang 40km bike course usa ka “two loop ride.”
Ang partisipante mo-exit padung sa main road, ug mopatuo sa Daang Maharlika Highway padung sa norte.
Samtang ang 10km run usa ka “flat one loop course.” Sa paggawas sa Waterfront Insular Hotel, ang partisipante modagan patuo, ug gamiton ang tuo nga bahin sa Daang Maharlika Highway padung norte.
Partisipante
Sa datus nga gihatag sa organizers, as of June 24 ning tuig, anaa sa 484 ang kinatibuk-ang partisipante sa aktibidad, 450 sa 5150 course, samtang 34 sa Sunrise sprint.
Luyo sa lokal nga atleta, ubay-ubay sab ka mga pros nga langyaw ang moapil.
Sa pro-female, anaa si Manami Iijima (Guam), Dimity Lee Duke (Australia), Lisa Tyack (Australia) ug Laura Wood (New Zealand).
Sa Pro-male, anaa sab sila Alez Polizzi (Australia), Mitch Robins (Australi), Kieran Mcpherson (New Zealand) ug Jakub Langhammer (Czech Republic).