SA MIAGING bulan pa nagsugod ang pagronda sa awtoridad sa mga buhatan sa giingong mga money investment schemes sa Davao Region.
Miresulta kini sa pagpanirado na sa uban, ug nakapadayon na sila sa pagdala sa dagkong kantidad sa salapi sa mga investors.
Gani ang ubang mga founder ug CEO nangadakpan sa awtoridad, apan ang wala pa nadakpan karon subay sa mandu ni Pangulong Rodrigo Duterte kini si Kapa Community Ministry International Inc. (Kapa) founder pastor Joel Apolinario.
Sa miaging adlaw, sikop ang founder ug CEO sa Titans 29 samtang ang sa Questlink nasakote sab, apan wala sila’y nauli sa mga investors.
Taman nalang ang mga investors sa pagpa-blotter sa kwerpo sa kapulisan ug nakat-on sa hitabo nga ang ilaha diay nga giapilan nga investment, usa ka “scam”.
Naa pa gayo’y wala nakat-on nga mga investors ning mga panahona. Ang uban nga investment groups nga kadungan sa Kapa, Titans 29 ug sa Questlink, naa gihapon.
Naa sila kinsa nagpasalig sa mga di tinuod nga pagsalig, ug naghatag og higayon kanus-a puwede ma payout ang na-invest, apan sa gamay nalang nga kantidad nga interest ang mabalik.
Unta lamang mabalik pa ang salapi sa mga investors, basin unya usa lamang kini ka pamaagi aron makadani na sab sila og mga tawo nga mo pay-in. Gumikan ning kasamtangan, wala nay nang pay-in human sa pipila ka kontrobersiya nga ilang gikalambigitan.
Ang bugtong himuon nalang mao ang paghunong sa pag pay-in, aron di na madugangan ang kantidad ugaling mahitabo nga mangawala na gyud kining mga investment schemes.
Daan naman gayod unta nasayod ang publiko nga scam kini, nganong nagpadala pa, busa moundang na kita, mintras di pa kaayo ulahi ang tanan.