Dela Rosa mihangyo ibalik ang kuwarta sa Kapa

DAVAO DEL SUR -- Dili na manghilabot si Senador-elect Ronald “Bato” dela Rosa sa desisyon ni Presidente Rodrigo Duterte nga di na pabalikon ang operasyon sa Kapa (Kabus Padatoon) Ministry International Inc.

Apan, nasubo si dela Rosa human hingpit ng nakahukom ang Presidente nga di na makabalik sa ilang operasyon ang Kapa nga gidumala sa nagtago-tago nga kanhi construction worker ug radioman nga karon si pastor Joel Apolinario.

“Naluoy ko sa mga miyembro nga wala mabalik ang kwarta pero kung moingon og pakialaman nako ang desisyon sa Presidente, that’s purely executive in nature,” asoy ni dela Rosa.

“So hulaton lang nato kung unsay sunod niyang lakang kung duna pa siya’y pagahimuon,” tataw niini.

Hinuon, gibutyag niini nga di siya magmakuli sa pagsulti kang Apolinario nga iuli na lamang ang kwarta sa mga sakop ugaling aduna’y higayon nga magkatagbo sila.

Sagad sa mga sakop sa Kapa ang namaligya na sa ilang mga kahayupan, kabtangan ug nangutang aron i-donar sa giingong religious organization ni Apolinario bugti sa matag nga 30-porsyentong interes.

Nanghinaot sab si dela Rosa nga mahibalik gihapon ang kwarta sa mga miyembro sa Kapa bisan og wa na’y apil ang interes.

Una ng gilimod ni dela Rosa nga aduna siya’y nadawat nga tabang pinansyal gikan kang Apolinario atol sa panahon nga nangampanya pa kini pagka-senador sa nasud. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph