GILAUMAN nga tanyagan sa Golden State Warriors si All-Star shooting guard Klay Thompson og maximum contract nga molanat og lima ka mga tuig nga nagbalor og $190 million inig abli sa free agency sa NBA ugma.
Sa taho sa ESPN, daan nang mipadayag si Thompson pinaagi sa iyang agent nga si Greg Lawrence nga andam siyang magpabilin sa Warriors kon tanyagan siya og maximum deal.
Bisan nakasinati og grabeng angol (torn ACL) ang 5-time All-Star, ang Warriors determinado gihapon nga kuhaon pagbalik si Thompson.
Si Thomspon gipili sa Warriors isip 11th overall sa 2011 rookie draft. Sulod sa walo niya ka mga tuig nga pagduwa sa Warriors, si Thompson nag-average og 19.5 puntos ug aduna kini 41.9 3-point shooting percentage.
Sa miaging season si Thompson nag-average og 21.5 puntos ug aduna kini 40.2 percent sa three-point land.
Ang Warriors nakataak sa finals sulod sa lima ka mga higayon ug nakalangkat og tulo ka mga titulo nga anaa si Thompson.
Gipahibalo sab sa Warriors nga papirmahon nila og multi-year contract extensions sila si general manager Bob Myers ug chief operating officer Rick Welts.
Ang duha pulos dako og natampo sa pagkaporma sa lig-ong puwersa sa Warriors.
Samtang tanyagan sa Boston Celtics ang All-Star guard nga si Kemba Walker og upat ka tuig nga kontrata nga mokantidad og $141 million sa higayon nga mosugod na ang free agency ugmang adlawa.
Matod pa sa taho, nga dawaton ang maong tanyag ni Walker, kinsa ubos sa Charlotte Hornets sud sa walo ka tuig.
Sa niaging duha ka semana, si Walker mipahibawo nga magpabilin siya sa Charlotte kon makahatag kini sa iyang gipangayong lima ka tuig nga kontrata nga mokantidad og $221 million apan ang tag-iya nga si Michael Jordan dili moapas niini.
Si Walker mao na unyay mopuli ni Kyrie Irving kinsa gipaabot nga adto na moduwa sa laing team. (AP, ESL)