PITO ka tuig ang nakalabay, natawo ang unang liwat sa magtiayon nga Harold Roldan Juguilon, 26, ug Aireen Bucabal, 27.
Ang bata ginganlan nila og Nathalie Pia Juguilon.
Sa dihang nagdako ang bata nga nag-inusara, gusto kini nga adunay kaduwa ug may kauban nga laing bata sa ilang balay, hinungdan nga nangayo kini og manghod sa iyang amahan ug inahan.
Sila si Aireen ug Harold nagkasabot nga manghuran na si Pia.
Niadtong Hunyo 13, 2018, gihimugso ni Aireen si Mia Claire Bucabal.
“Nagpasalamat ko sa Ginuo kay successful ang akong pagpanganak. Nag-ampo ko nga Lord, mogawas siya nga dili ko ma-cesarean, ma-normal delivery ko kay dako baya siya bataa,” paambit ni Aireen.
Wala man maglisod sa iyang pagmabdos ug pagbati si Aireen, apan nakahilak kini gumikan kay wala sa iyang kiliran si Harold sa dihang iyang gipakatawo ang ikaduhang anak.
Si Harold tripolante og barko nga magbiyahian sa laing mga nasod.
Emosyonal ang amahan dihang nakita ang ikaduhang anak sa video call pinaagi sa manghod ni Harold.
“Nihunong siya og trabaho kadyot para makakita sa bata. Nalipay siya at the same time naguol kay wala siya pagpanganak nako,” asoy ni Aireen.
Wala pakyasa ni Harold nga makauban si Mia dihang ilang gisaulog ang kasumaran sa unang adlaw nga natawhan niini niadtong Hunyo 13, 2019.
Giandaman sa magtiayon og birthday party si Mia sa ilang panimalay sa Barangay Bulacao, siyudad sa Sugbo.
Nalingaw ang mga bata nga mga bisita sa party tungod sa giandam nga games ug mga premyo ug nagbusog usab sila kuyog ang mga hamtong sa lamian nga mga pagkaon.
Ang tema sa party kay kabahin sa salida nga Frozen sa Walt Disney Pictures sanglit susama usab sa mga character sa salida ang magsuong Pia ug Mia nga pulos duha ka mga babaye. (SCG)